هلمند رسمی‌لری‌نینگ ایتیشیچه، مذکور ولایت‌ده اوتگن کیچه کیچ پیت بیر عسکر 12 یولداشینی آتیب اولدیرگن.
هلمند حاکمی سوزلاوچیسی عمر زواک‌نینگ سلام‌وطندارگه ایتیشیچه، بو واقعه ولایت‌نینگ لشکرگاه شهری ایکینچی امنیتی حوزه‌گه تیگیشلی «سره گودر» منطقه‌سیده یوز بیرگن. جناب زواک‌نینگ ایتیشیچه، مذکور عسکر همراه‌لرینی اولدیرگنی‌دن سونگ محل‌دن قاچیب طالب‌لرگه قوشیلگن.
بیراق، آتی فاش ایتیلیشینی ایستمه‌گن امنیتی بیر منبع‌نینگ سلام‌وطندارگه ایتیشیچه، «سره گودر» پوسته‌سی‌دن ایکی پولیس عسکر طالب‌لر بیلن علاقه قوره‌دی و یولداشلرینی اولدیرگندن کیین، پوسته‌ده‌گی برچه حربی جهاز، موتر و باشقه مهمات‌لرنی اوزلری بیلن آلیب کیته‌دیلر.
شونینگ‌دیک، 505 بست زون‌نینگ جنایی تدقیقات باشلیغی توریالی روهی‌نینگ ایتیشیچه، واقعه دلیلی حاضرگه‌قدر بیللی بولمه‌گن، بیراق پولیس کوچلری بو واقعه توغریسیده تیرگاو باشله‌گن.
بیراق، طالبان گروهی سوزلاوچیسی قاری یوسف احمدی‌نینگ ایتیشیچه، اوتگن کیچه «سره گودر» پوسته‌سینی باسیب و بو پوسته‌نینگ برچه حربی جهازی‌نی اوزلری بیلن آلیب کیتگن‌لر.
اوشبو واقعه ایچکی ایشلر وزیرلیگی آلتی آیدن بویان پولیس تشکیلاتی‌ده اصلاحات کیریتیش لایحه‌سی اوستیگه ایشلب کیله‌یاتگن بیر چاغده یوز بیرگن.
