افغانستان جنوبی‌ده جایلشگن هلمند ولایتی‌نینگ محلی بلند مرتبه‌لی رسمیلری، نادعلی تومنی‌نینگ دولت قوراللی مخالف‌لری اشغالی‌گه اوتگن منطقه‌لر قیته‌دن آلینیشی اوچون 700 حربی اوشبو ولایت‌گه کیلگن لیگی باره‌سیده خبر بیرگن‌لر.
اوچ کوندن بیری قوراللی طالبلر نادعلی تومنی‌گه نیچه تاماندن هجوم قیلگن‌لر. نتیجه‌ده تومن‌نینگ بیر قنچه حدودی جنگری طالبلر نظارتی‌گه اوتگنی ایتیله‌دی.
شونینگ‌دیک ولایت محلی رسمیلری، تینچ اهالی‌گه تلفات ییتمس‌لیک اوچون افغان ملی کوچلری تکتیکی آرتگه قیتگن‌لر دیدیلر.
هلمند ولایت والیسی سوزلاوچی‌سی عمر زواک‌که کوره، ولایت‌گه یوباریلگن ملی کوچلر ملی امنیت، پولیس و ملی اردو حربی‌لردن عبارت بولگن.
جناب زواک، مخصوص حربی‌لر نادعلی تومنی‌گه ییتیب بارگن‌لیک‌لرینی تیل‌گه آلگن.
شونینگ‌دیک هلمند ولایت والی‌سی‌نینگ سوزلاوچی‌سی، اوتگن کیچه ولایت‌نینگ مارجه تومنی‌ده یول‌گه قوییلگن حربی تازه‌لش عملیات آقیمی‌ده قوراللی طالب‌لرنینگ 25 ته‌سی اولدیریلگن و 15 ته‌سی ایسه یره‌لنتیلریلگن دیگن.
قوراللی طالبلر تامانی هنوزگچه بو توغریده بیرار نرسه دیمه‌گن.
عین حالده، اوشبو هفته باشله‌نیشی بیلن قوراللی طالبلر ولایت‌نینگ خانشین تومنی‌نی هم اوز نظارت‌لریگه آلگن ایدی. لیکن، بو تومن بیر کوندن سونگ قیته افغان ملی کوچلری تصروفی‌گه اوتدی.
