افغانستان حربی کوچلریدن بیری داوونینگ اوغلی ظاهر دیر. اونینگ جسدی ایکی آیدن بویان غور مرکزی کسلخانه‌سینی موزخانه‌سیده سقلنه‌دی.
سلام‌وطندارگه صحبت بیرگن غور ولایتی کسلخانه‌سینی آمری میراجان احمدی‌نینگ ایتیشیچه، خوفسیزلیک رسمی‌لری بو عسکرنینگ جسدی‌نی تانیب و عایله‌سیگه تاپشیریش اوچون بو کسلخانه‌گه انتقال بیرگن؛ بیراق حاضرگچه کیم‌سه جسد اوچون مراجعت قیلمه‌گن.
غور ولایتی کسلخانه‌سینی آمری‌نینگ ایتیشیچه، جسد بیلن بیرگه بولگن معلومات بو عسکر فراه اوروش‌لریده هلاک ایتیلگنینی کورسته‌دی و شهرک تومنی‌نینگ برزو قیشلاغی‌نی یشاوچیسی دیر.
غور ولایتی‌نینگ محلی مسؤوللریدن تنقید قیلگن ولایت یشاوچیلری و مدنی فعاللری‌نینگ ایتیشیچه، اولکه‌دن دفاع قیلیب و خوفسیزلیک تأمین‌لنیشی اوچون عصیانچی گروهلر بیلن اوروشه‌دیگن عسکرلر، هلاک ایتیلگن‌لریدن سونگ، مهرسیزلیک‌که دوچ کیله‌دیلر.
اوشبو مدنی فعاللرگه کوره، امنیتی کوچلرنینگ جسدلرینی تانیب و عایله‌لریگه تاپشیریش امنیتی اداره‌لرنینگ بیرینچی مسؤولیت‌لریدن دیر؛ بیراق هردایم بو توغریده بی‌فرق یانده‌شیله‌دی.
غور ولایتیده حربی کوچلرنی اویغولشتیرووچی آمری محمد داوود رحمانی، بو توغریده خبرسیزلیک بیلدیرگن؛ بیراق ایتیشیچه، بو موضوع نی شهرک تومنی‌نینگ محلی مسؤوللری و برزو قیشلاغی‌نینگ قوم بویوک‌لری بیلن شریک قیلگن.
برزو قیشلاغی غور ولایتی‌نینگ شهرک تومنی‌نی شمالی بادغیس ولایتی‌نینگ چیگره‌سیده جایلگن و غور محلی مسؤوللریگه کوره، بو قیشلاق طالبان گروهی‌نینگ نظارتی‌ده دیر.
