بوگون «چهارشنبه» کابلده ترورچیلیک قربانلریدن ایسلش نیتده یولگه قوییلگن خلق ارا ییغینیده افغانستان انسان حقلری ایرکین کمیسیونی باشلیغی سیما سمرنینگ ایتیشیچه، افغانستان اوروش جنایتلریگه تیگیشلی دوسیهلر تیکشیریلیشی اوچون خلق ارا جنایی محکمهسیگه رخصت بیریلیشی لازم.
خانم سمرگه کوره، بو توغریده زمینه یرهتیش اوچون افغانستان حکومتی و دنیا جماعهچیلیگی مسؤول دیر.
انسان حقلری ایرکین کمیسیونی باشلیغینینگ کوپهیتیریشیچه، اوروش جنایتی توختهتیلیشی، اوروش قربانلرینی رقمی کمهییشی و عدالت تأمین ایتیلیشی اوچون ملی و خلق ارا مکانیزملر قوریلیشی کیرهک.
بونگه قوشیمچه خانم سمرنینگ ایتیشیچه، افغانستان ایشلریگه ارهلشهدیگن هر بیر مملکت بیلن بیرلشگن ملتلر تشکیلاتی بحث قیلیشی لازم.
باشقه تاماندن، ترورچیلیککه قرشی کورهش ایشلری بوییچه بیرلشگن ملتلر تشکیلاتینینگ کاتبینی اورین باسری ولادیمیر ایوانوویچ ورونکوف نینگ ایتیشیچه، حاضرگی شرایط گه قرشی قرهگنده برچه اوروش قربانلری بیلن بیر سیس بولیب و اولرنینگ یالغیز قویمسلری درکار.
جناب ورونکوف گه کوره، جاری میلادی ییلنینگ بیرینچی آلتی آییده افغانستان تینچ اهالی قربانلرینینگ رقمی 5 مینگ 222 کیشی گه ییتیشگن. او بو رقمنی «دهشتلی» دییدی.
افغانستان انسان حقلری ایرکین کمیسیونی مسؤوللری نینگ ایتیشیچه، اوتگن 9 ییل جریانیده اوروشلر نتیجهسیده قربانک بولگن تینچ اهالینینگ رقمی 64 مینگ کیشیدن آرتیق بولگن و بو جملهدن 36% هلاک و باشقه 64% یرهلنگن.
