دې وروستیو کې په ټولنیز شبکو په ځانګړي ډول فېسبوک کې د ځېنو ښځو له لوري د « اعتراض لرم» هشټک کارولو یو کمپاین پیل شوی چې هره ورځ یې شمېر زیاتېږي.
مېرمنې پهدې هشتګ سره د جنسیتي تبعیض په اړه اعتراض څرګندوي او وايي چې دغه چارې ورځ تر بلې د مېرمنو د ژوند کړۍ تنګوي.
د سحر فطرت په نوم د فېسبوک یوې کاروونکې دغه ډول ځړونی خپور کړی:«زه ستاسو نرواکو ښارونو او واټونو، د رسنیو او هغو تبلیغاتو چې د مېرمنو خلاف دي؛ د ښځو وجود ته په کتو له سپکاوي ډکو الفاظو په کارولو او د مېرمنو حقونو په برخه کې د ټولو کلیشهيي شویو شعارونو او مراسمو په خلاف اعتراض لرم.»
مېرمن فطرت زیاتوي، له دغو اعتراضونو مخکې په هېواد کې د مېرمنو حالت تیتو پرک او په ځانګړي سیمې او وخت پورې تړلی و؛ خو اوسني حالت ته په کتو، پهدې پرېکړه وشوه چې ښځې خپلې غوښتنې او اعتراضونه د نورو غوږونو ته هم ورسوي.
مېرمن سحر زیاتوي: «موږ تل د موضوع لومړي مخ ته ګورو او د هغوی شاوخوا عواقبو ته ارزښت نهورکوو، پهخپل څنګ کې داسې پدیدې لرو چې هغه بېخي په پام کې نه نیسو.»
د میترا الکوزي په نوم یو بله اعتراضګره وايي:«زه په بېغورۍ او د غږ په خاموشۍ اعتراض کوم، د ښار په واټونو کې د هغو نارینهوو د کتو په څرنګوالي اعتراض لرم چې په ځیر ـ ځیر کتو مې خوري، د دې ښار د نارینهوو دین ساتلو له کبله په لګولشویو محدودیتونو اعتراض لرم.»
د لیلا حیدري په نوم یوه مدني فعاله هم پهدې اعتراضونو کې لیدل کېږي. مېرمن حیدري پهخپلې فېسبوک پاڼه لیکلي:«زه په نرواکیو ښارونو اعتراض لرم، د دولتي او نادولتي ادارو په نرواکیو جوړښتونو اعتراض لرم، په نرواکیو او د مېرمنو په خلاف قانونو، سیاستونو او پالیسو اعتراض لرم، په ښوونیزو مرکزونو کې د موجود جنسیتي تبغیض په خلاف نیوکه لرم، په هغو مېرنو چې نرواکي اندونه لري … اعتراض لرم.»
دغه کمپاین د مارچ میاشتې له ۸ مې نېټې وروسته زښته پراخ شو او هره ورځې یې شمېر زیاتېږي. اعتراضګرې مېرمنې د دغه کمپاین موخه د مېرمنو خلاف د جنسیتي تبعیض لهمنځه وړل بولي.
