د هرات حوزوي روغتون رییس محمدنعیم دولتي پهدې ولایت او لوېدیځ زون کې د کانګو نارغي پېښو زیاتوالي په اړه اندېښنه ښودلې ده.
دی وایي، دا ناروغي تر ډېره له ترکمنستان او ایرانه د واردشویو ناروغو څاریو پهواسطه دې ولایت ته رالېږدول شوېده.
د ښاغلي دولتي په وینا، د کانګو تبې ناروغي ۴۷ سلنه پېښې په ښځینهوو کې لیدل شوې چې د څارویو غوښې پخولو پرمهال د روغتیا ساتنې نه مراعات له امله دې ناروغۍ نیولې دي.
د ده په خبره، تر اوسه د دې ناروغۍ ۴۱ مثبتې پېښې ثبت شوي او ۴ تنه یې وژلي هم دي.
د هرات حووزوي روغتون مسوولانو په وینا، تېرکال پر کانګو تبې۸۰ کسان اخته وو چې ۱۷ تنه یې ژوند بایللې و.
په لوېدیځ زون کې بېړنیو پېښو ته د ځواب ویلو څانګې مسوول احمدامیر نژاد هم د دې ناروغي پېښو زیاتوالي په اړه خبرداری ورکوي او وایي، تر دامهاله د افغانستان په بېلابېلو ولایتونو کې ۱۱۵ مثبتې پېښې ثبت شوي چې لهدې شمېرې له ۴۰ سلنو زیاتې پېښې په هرات کې دي.
د کانګو تبه د څاریو او انسانانو ګډه ناروغي ده چې د کنې پهواسطه د وینې یا ناروغ څاروي د غوښې له لارې انسانانو ته لېږدېږي.
ډاکتر وایي، د ناروغ څاروي په غوښه کې د دې ناروغۍ ویروس له منځهوړلو په موخه باید غوښه ۲۴ ساعته په یخچال کې له کېښودو وروسته وخوړل شي.
