هرات ښار کې د مقناطېسي ماین جوړولو مرکز کشف شو

د هرات د والي ویاند جیلاني فرهاد وايي، د ملي امنیت ځواکونو تر هغې وروسته چې د هرات ښار په درب‌خوش سیمې کې پر یوه هوټل برید وکړ، یاد مرکز یې کشف کړ.

د فرهاد په وینا، د دې مرکز مسوول د پنجشنبې په شپه د یوه رېنجر موټر تر الوزېدو وروسته نیول شوی او منلې یې ده چې د کشف شوي ماین جوړولو مرکز مسوول و.

فرهاد زیاتوي، هغه چاودېدونکي توکي چې په یاد مرکز کې یې نیولي، شاوخوا ۲۵ ماینونه ترې جوړېدای شي.

د چارواکو په وینا، ډېری لاسي چسپکي ماینونه هم په همدې مرکز کې جوړېدل.