هرات ولایتیده جای‌لشگن چیگره کوچلر 5- لواسی نینگ اورین باسری بهاوالدین غوری نینگ سلام‌وطندارگه ایتیشیچه، طالبان جنگریلری هرات- تورغندی قتناو یولیده چیگره کوچلرنینگ پوسته‌لری اوستیگه هجوم قیلگنلر.
اونینگ ایتیشیچه، بو هجومده چیگره کوچلر پوسته‌لریدن بیری بوتون حربی تجهیزات‌لری بیلن طالبان قولیگه سقوط قیلگن و اوشبو کوچلردن 5 ته‌سی هلاک ایتیلیب و باشقه 3 ته‌سی یره‌لنگن دیر.
عین‌حالده، محلی بیرمنبع، مردمی کوچلردن 15 ته‌سی نینگ غور ولایتده هلاک ایتیلگنی‌دن خبر بیرگن.
غور ولایتیدن دولتی بیرمنبع نینگ سلام‌وطندارگه ایتیشیچه، ساغر تومنی نینگ «جواجه» منطقه‌سی طالبان قولیگه سقوط قیلیب و آتیشمه نتیجه‌سیده، مردمی کوچلردن 15 ته‌سی هلاک ایتیلگن. منبع‌گه کوره، بو واقعه‌ده طالبان جنگریلریدن 2 ته‌سی هلاک ایتیلیب و باشقه بیرقطاری یره‌لنگن دیر.
ساغر تومنی نینگ محلی مسووللرینی طالبان هجومی‌نی تصدیق‌لب ایتیشیچه، اوشبو تومن جدی امنیتی تهدید آستیگه قرار تاپگن و دقت بولمه‌گن صورتده، طالبان قولیگه سقوط قیلیشی ممکن.
غور حاکمی سوزلاوچیسی عبدالحی خطیبی، «جواجه» منطقه‌سی نینگ طالبان قولیگه سقوط قیلگنی‌نی تصدیق‌لگن، بیراق تلفات خصوصیده معلومات بیرمه‌گن.
طالبان گروهی حاضرگه‌قدر بو توغریده فکر بیلدیرمه‌گن.
گزارش‌لرگه کوره، طالبان جنگریلری ایکی هفته‌دن بویان غور ولایتی نینگ غربی تومن‌لریده توپلنگن ایکن‌لر.
