هرات محلی رسمی‌لری‌نینگ ایتیشیچه، شیندند تومنی‌ده قورال‌لی طالب‌لرنینگ اوز آره‌سیده یوزبیرگن توقنه‌شوولرده کمیده 80 تینچ اهالی آتیب اولدیریلگن. رسمی‌لرگه کوره، مذکور تومن‌دن نیچه باشی کیسیلگن جان‌سیز تنه تاپیلگن.
محلی رسمی‌لر، شیندند ده اوز آره‌سیده توقنشگن گروه اعضالریدن بیرقطاری‌نینگ باشی کیسیلگنی و آتیب اولدیریلگنینی اوروش جنایتی اورنکی دیب بیله‌دی.
شیندند اوروشی‌ده تینچ اهالی قربانلیگی توغری‌سیده حاضرگچه توغری رقم قولگه کیریتیلمه‌گن؛ بیراق تینچ اهالی قربانلری و ییتکیزیلگن زیانلرنی تیکشیریش اوچون، دولت تامانیدن مذکور تومن‌گه هیأت یوباریلگن.
شیندند یشاوچی‌لری و قوم بویوک‌لریدن بیرقطاری‌نینگ ایتیشیچه، ملاننگیالی گروهی مغلوب بولگنی‌دن کیین، ملاصمدنینگ جنگری‌لری، تینچ اهالی اوی‌لریگه هجوم اویوشتیریب و محل یشاوچیلرینی آتیب اولدیرگن.
هرات ولایتی کینگشی‌نینگ سابق اعضاسی و قوم بویوک‌لریدن بیری تورمحمد ظریفی‌نینگ سلام‌وطندارگه ایتیشیچه، قاره بیره‌قلی نقاب کیگن کیشی‌لر، ملاننگیالی نظارتی‌ده‌گی منطقه‌گه هجوم اویوشتیریب و محل یشاوچیلرینی آزار بیرگن‌لر. ولایتی کینگش‌نی اوشبو سابق اعضاسی‌نینگ ایتیشیچه، « حکومت یالغیز دولتی اداره‌لرنی نظارت‌گه آلگن، وضعیت شونده‌ی بیر شکلده دوام ایتگن صورتده، شیندند سقوط قیله‌دی».
عین حالده، هرات ولایتی‌نینگ مطبوعات مسؤولی جیلانی فرهادنینگ ایتیشیچه، شیندند ده قورال‌لی طالب‌لرنینگ اوروش جنایتی باشقریلیشی اوچون، پنج‌شنبه کوندن بویان امنیتی کوچلر شیندند تومنی‌نینگ اوزاق منطقه‌لریده «عزم» ناملی تازه‌لش عملیات یولگه قویگن. جناب فرهادنینگ ایتیشیچه، اوشبو عملیات نتیجه‌سیده حاضرگه‌قدر کمیده 41 طالب هلاک بولیب و باشقه 50 طالب یره‌لنگن. اونگه کوره، عملیات باشله‌نیشی‌گه قوشیمچه اوروش‌دن زیان کورگن یشاوچی‌لرگه یاردم بیریش هم باشلنگن.
قورال‌لی طالب‌لر حاضرگچه بو توغریده هیچ نرسه دیمه‌گن.
اوتگن هفته «دوشنبه کون» قورال‌لی طالب‌لر هرات ولایتی‌نینگ شیندند تومنی‌ده اوز آره‌سیده اوروشگن و ایکی تامان هم آغیر قربانلیک بیرگن. اوشبو توقنه‌شوو ملا اختر منصورگه تیگیشلی ملا صمد جنگری‌لری بیلن ملا رسول‌گه تیگیشلی ملا ننگیالی جنگری‌لری اورته‌سیده یوزبیرگن.
