افغانستان ایرکین میدیالریدن حمایه ایتووچی تشکیلات (نی) نینگ ایتیشیچه، میدیا فعاللری و خبرچیلر جانیگه قصد قیلینهدیگن ترورلرگه بوندن آرتیق چیدهآلمهیدی و دولتدن خبرچیلر جانیگه قصد قیلهدیگن تروریستلر آلدی آلینیشینی سورهدی.
سونگی نیچه آیده مملکت بویلب اینیقسه پایتختده ایش بیلرمانلر و خبرچیلر جانیگه نیچه مرته قصد قیلیندی، سونگی قضیه، اوتگن کون جاوید کوهستانینینگ اویی و طوفان وزیرینینگ موتری اوستیگه هجوم اویوشتیریلیب و نتیجهده نیچه کیشی یرهلنگن.
نی تشکیلاتی اجراییه باشلیغی مجیب خلوتگرنینگ میدیالرگه ایتیشیچه، مملکت امنیتی ادارهلری آچیق صورتده، میدیا فعاللری تروری خصوصیده، معلومات بیریشی کیرهک. شونینگدیک، تروریستلرنی قولگه آلیب و محکمهگه تاپشیریشلرینی سورهدی. جناب خلوتگرگه کوره، تیزیم ایچیده بیرقطار کیشیلر افغانستان برابریده پاکستاننی ناتوغری سیاستیدن حمایه قیلهدی؛ اولر میدیالرنی اوزلری اوچون جدی تهدید بیلهدی.
نی تشکیلاتی اجراییه باشلیغینینگ ایتیشیچه، میدیا فعاللری توغریسیده حکومتنی بی فرق یاندهشی، خلق ایشانچسیزلیگی و حکومت بیلن خلق اورتهسیدهگی علاقه کیسیلیشیگه سبب بولهدی. جناب خلوتگر، جمهور رییسنینگ اروپایی مملکتلرگه قیلگن سفریده ایرکین خبرچیلر برابریده حکومت تشریفاتی ریاستی اورین باسرینینگ ناتوغری حرکتیدن تنقید قیلیب ایتیشیچه، دولت بو توغریده افغانستان میدیا جماعهسیگه جواب بیرسین.
عین حالده، بوگون سنامجلسی عمومی ییغینیده بیان ایتیلیشیچه، کابل ترورلری مملکت ایچیده ریجهلنهدی و قوشنی مملکتلر بیلن علاقهسی یوق دیر. شونینگدیک، ایچکی ایشلر وزیرلیگینینگ ایتیشیچه، بو توغریده تیکشیروونی باشلهگن و تیزلیکده، اوشبو تیکشیروولر نتیجهسینی میدیالر حضوریده بیان ایتهدی.
