نورستان ولایتی‌نینگ عیال‌لر ریاستی مسؤول‌لری‌نینگ سلام‌وطندارگه ایتیشیچه، اوشبو ولایت عیا لریگه قرشی زوره‌وانلیک‌نی 30 فایزی پولیس کوچلری تامانیدن عمل‌گه آشیریلگن. بیراق، حاضرگه‌قدر، هیچ بیر پولیس عیال‌لرگه قرشی زوره‌وانلیک‌که عیب‌لنیب قولگه آلینمه‌گن.
نورستان ولایتی‌نینگ عیال‌لر ریاستی باشلیغی زاهده فیضان‌نینگ ایتیشیچه، جاری ییل، نورستان‌ده عیال‌لرگه قرشی 55 زوره‌وانلیک قضیه‌سی رویخط‌ده آلینگن و بو جمله‌دن 16 قضیه‌ده پولیس کوچلری عیب‌لنگن. اونینگ ایتیشیچه، اوشبو ولایت پولیسی‌نینگ، عیال‌لرنی اویدن قاچیریش‌گه هم قولی بار.
عیال‌لر ریاستی باشلیغی‌گه کوره، اوشبو رقم یالغیز عیال‌لرنینگ ایشلری بوییچه ریاست فعال بولگن تومن‌لردن توپلنگن، بیراق باشقه کامدیش، برگمتال، مندول و وانت‌وایگل دیک ناتینچ تومن‌لردن هیچ بیر قضیه رویخط‌ده آلینمه‌گن.
شونینگ‌دیک، مذکور ولایت‌ده عیال‌لرگه قرشی زوره‌وانلیک‌که پولیس کوچلری‌نینگ قولی بارلیگی‌نی تصدیق‌لگن نورستان ولایتی کینگشی باشلیغی سعدالله پاینده‌زوی‌نینگ ایتیشیچه، امنیتی کوچلر اینیقسه نوستان پولیسی‌نینگ عیال‌لرگه قرشی زوره‌وانلیک‌که قولی بار.
بیراق، نورستان حاکمی حافظ عبدالقیوم‌نینگ ایتیشیچه، عیال‌لرنی اویدن قاچیریش و عیال‌لرگه قرشی زوره‌وانلیک‌که پولیس‌نینگ قولی بارلیگی خصوصیده، حاضرگچه هیچ بیر اداره تامانیدن اولرگه خبر ییتکیزیلمه‌گن.
شونینگ‌دیک، اوشبو ادعالرنی رد قیلگن نورستان پولیس قومندانی اکرام‌الدین سریع‌نینگ ایتیشیچه، عیال‌لرنی اویدن قاچیریش و عیال‌لرنی اذیت قیلیش‌ده پولیس‌نینگ قولی بولگنی خصوصیده بیران دوسیه بولگنده هم قیز و اوغیل‌نینگ ایسته‌گی‌ده عمل‌گه آشیریلگن.
عیال‌لرگه قرشی زوره‌وانلیک قضیه‌لریده امنیتی کوچلر اینیقسه مملکت پولیسی‌نینگ قولی بارلیگی ینگی بیر نرسه ایمس؛ بوندن آلدین، کابل و هرات ولایت‌لریده عیال‌لرگه قرشی زوره‌وانلیک‌که پولیس‌نینگ قولی بارلیگی خصوصیده، گزارشلر ترقه‌تیلگن ایدی.
