قندوز ولایتی نینگ بوزکندهاری قیشلاغیده خلق ارا حربیلر تامانیدن اوتکزیلگن هوا هجومی عاقبتیده قربان بولگنلر سانی آشیشی بیلن ولایت نینگ بیر قنچه مدنی جماعه چیلیک فعاللری بوگون (شنبه) ناراضیلیک نمایش اوتکزیب « تینچ اهالی اولدیریلیشی‌نی توخته تینگ» دییه شعار بیریب، اوروش تامانلرینی تینچ اهالی جانیگه اونچه‌لیک اهمیت بیرمسلیک‌ده عیبله‌گنلر.
قندوزلیک مدنی فعال لیدا فرحمت شیرزادنینگ سوزلریگه‌کوره، اعتراض بوندن نیچه کون آلدین خلق ارا حربیلرنینگ تونگی عملیاتی نتیجه‌سیده تینچ اهالیگه بیریلگن تلفات اوچون یولگه قوییلگن. چیت ایللیک حربیلرنینگ تونگی عملیات عاقبتیده 30دن آرتیق تینچ اهالی نینگ حیاتیگه پایان بیرگن ایدی.
اوشبو مدنی فعاللر تامانیدن صادر بولگن قطعه‌نامه ده 2 مرته هم قندوز ولایتی قوراللی طالبلر اشغالیگه اوتگنده ملی کوچلر همده طالبلر تینچ اهالی نینگ جانی سقله‌نیشی اوچون هیچ اعتبار بیرمه گنلر دییلگن. اوروشده 500 دن آرتیق انسان هلاک بولیب کمیده 1000 کیشی آغیر یینگیل یره لنگن.
قندوز نینگ کندهاری قیشلاغی نینگ اربابی محمد ایوب، خارجی کوچلر تامانیدن اوتکزیلگن عملیاتده 36 نفر تینچ اهالی قربان بولدی و بلاغتگه ییتمه‌گن 17 گودک جانلرینی قولدن بیردی دیگن. او، حادثه نینگ عامللری جزالنمه‌گن حالده، اهالی حکومت بیلن علاقه‌سینی توخته دی دیگن.
اما، مدافعه وزیرلیگی نینگ سوزلاووچیسی دولت وزیری، قورالی طالبلر اهالی اویده پوسته قوریب افغان ملی کوچلرینی نشانگه آلگنلر دیدی. شونینگدیک چیت ایللیک کوچلر اوشبو اویلرده عملیات اوتکزیب جنگریلر طالبلرنینگ مهم قوماندانلرینی نابود قیلگنلر دیگن جناب وزیری.
قندوز نینگ شمالی تامانیدن‌گی قیشلاق بوندنی ایکی ییلدن بیری جنگری طالبلر اشغالیده بولگن. افغان ملی کوچلری بیلن طالبان اورته‌سیده یوز بیرگن اوروشلرده اصلی جبرنی بوزکندهاری قیشلاغی نینگ اهالیسی کوریب کیلگن.
