.jpg)
د راپورونو پر بنسټ د سولې نوبل جایزې احتمالي نوماندانو په ډله کې د افغانستان د بایسکل ځغاستې ښځينه ټیم هم د ایټالیا د پارلمان له خوا د جایزې اخیستلو له پاره معرفي شوي.
د دغې جایزې د احتمالي نوماندانو په ډله کې د امريکا د استخباراتي ادارې پخوانی کارکوونکی اډوارډ سنوډن، د نړۍ د کاتولیکانو رهبر، د افغانستان د نجونو د بایسکل ځغاستې ټيم، هغه یزیدي ښځه، چې د د داعش له منګلو تښتېدلې وه او نور هغه کسان، چې د نړۍ په سوله کې اساسي رول لوبولي شامل دي.
.jpg)
د راپورونو پر بنسټ د ایټالیا هېواد د پارلمان ۱۱۸ غړیو یو اوږد لیک لاسلیک کړی او د دغه لیک په ترڅ کې يې غوښتنه کړې، چې د افغانستان د بایسکل ځغاستې فدراسیون دې د نوبل د سولې جایزې ته ونومول شي.
د ایټالیا د مشرانو جرګې مرستیال د یوې خبري ناستې پر مهال وویل، بایسکل په افغانستان کې یوه خورا عامه، ارزانه او دوامداره ترانسپورټي وسیله ده، چې چاپېریال ته تاوان نه رسوي.
همدارنګه د ایټالیا د مشرانو جرګې مرستیال زیاته کړې، چې د دغو ټولو دلایلو په خاطر پکار ده، چې د نوبل د ۲۰۱۶م ز کال د سولې جایزه د افغانستان بایسکل ځغاستې د نجونو فدراسیون ته ورکړل شي.
د نوبل جایزې له پاره ټاکونکې کمېټه هر کال د ناروې په پلازمینه اسلو کې له شاوخوا ۲۰۰ بنسټونو څخه با اعتباره نوماندان جذبوي، چې د هغوی اسناد بیا د ۵۰ کلونو له پاره پټ ساتي.
د نوماندانو نوملړ له نهايي کېدو وروسته د فبرورۍ په لومړۍ نيټه د ۵ کسیزې کمېټې په واسطه د دغو نوماندانو لنډ لیست ترتیبیږي.
وروسته له خورا مشورو وروسته بیا دغه جایزه یو شخص یا یوې ډلې ته ورکول کيږي.
د نوبل د سولې جایزه د نوبل له پنځو جایزو شمېرل کيږي، چې د سویډني صنعت ګر او مخترع الفرد نوبل له خوا منځ جوړه شوې.
دغه جایزه د لومړي ځل له پاره په ۱۹۰۱م ز کال ورکړل شوه.
