د کورنیو چارو وزارت نظامي څارنوالي وایې، چې ۱۳۹۳ لمریز کال کې د دغه وزارت قرارګاه ورته د ۶۵۰ مجرم پولیسو دوسیې ورسپارلي، چې په دې برخه کې نږدې ټولې یې څيړل شوي هم دي.
د دغه څارونوالۍ رییس څارنپال ډګر جنرال سید فضل الکریم سادات سلام وطندار ته وویل، چې له دندې د پولیسو تېښته، د وسلو ورکېدل، غېرحاضري او ناقانونه د عاموخلکو وهل ټکول هغه جرمونه دي، چې په دغو دوسیو کې پولیس پرې ګرم ګڼل شوي دي.
سادات زیاته کړه، چې دوی د پولیسو عمومي ریاستونه، ځانګړې قطعې او سرحدي پولیسو قطعو کې د پولیسو جرمونه په نښه او څيړي.
دی وايي، چې یوازې د پولیسو د جرمونو اړوند ۶۵۰ دوسيو څخه شاوخوا ۵۰۰ دوسيې محکمې څېړلي او ۱۵۰ نور يې تر څېړنو لاندې دي.
جنرال سادات وایې، چې د کورنیو چارو وزارت له سربازه تر ډګرواله پورې مجرم کسانو دوسیې د دغه وزارت نظامي څارنوالۍ څيړي.
خو نوموړي زياته کړه، د مجرم جنرالانو دوسیې بیا د څيړنو ریاست له خوا څیړل کېږي، چې همدا اوس هم د یو شمېر جنرالانو دوسيې هلته تر څېړنو لاندې دي.
اخوا یو شمېرعام وګړي بیا د ځينو پولیسو له ناسمو کړنو شکایت کوي او وایې، چې په ډیرو برخو کې د پولیسو له خوا ځورول، وهل او ټکول کيږي.
په دې اړه د احمد الله په نوم د کابل ښار يو تن اوسېدونکی وايي، چې که دوی د حوزو پولیسو ته پېسې ور نه کړي، نو د دوی له لوري سخت ځورول کيږي.
اخوا بيا د امرالدين په نوم بل اوسېدونکي سلام وطندار ته وویل، چې پولیس په غېر قانوني توګه خلک نه شي ځورولی، ځکه دده په وينا که چېرې دی څوک وځوروي، نو د پوليسو ۱۱۹ شمېرې ته شکایت کوي.
د کورنیو چارو وزارت د نظامي څارنوالۍ رييس جنرال فضل الکریم سادات د تنخواو کموالی د دوی له پاره امن چاپېریال نه شتون، د دوسیو څيړنو له پاره کم پرسونل د دغې څارنوالۍ بنسټیزې ستونزې وبللې.
نوموړی ټينګارکوي، چې سږني کال کې به د پولیسو په اصلاحاتو او ظرفیت لوړونې کې حکومت ډیر پرمختګونه وکړي.
جنرال فضل الکريم وايي، پخوا ۲۷۰۰ کسانو د ۳۰ زره پولیسو له پاره کار کوه، خو اوس بیا د همدغو پولیسو لپاره ۲۷۰ کسان پر دندو بوخت دي.
د نوموړي په وينا همدا لامل دی، چې دوسيې هم ژر نه څېړل کيږي.
ده د خپلو کارکوونکو له پاره د وظيفوي مصوونيت نه شتون یو له جدي ستونزو په ګوته کړ.
په ټوله کې پولیس تل د خلکو سره په زیاتو مواردو کې مرستې کړي، خو چارواکي وایې چې د پولیسو په لیکوکې نا لوستي او کمزوری اقتصاد د خلکو د ځورونې سبب ګرځي.
