بوگون «شنبه» کابل‌ده خبری بیر ییغین اوتکزگن سیاسی حزب‌لرنینگ نظارتچی‌لری، سیلاولر ایرکین کمیسیونی‌دن کابل آوازلرینی بوتونله‌ی بیکار قیلیب و بو ولایتده قیته‌دن نماینده‌لر کینگشی‌نینگ سیلاوی یولگه قوییلیشی‌نی سوره‌گن.
سیاسی حزب‌لر نظارتچی‌لری‌نینگ ایتیشیچه، نماینده‌لر کینگشی‌نینگ سیلاوی تنیق بولمه‌گن و زوروانلر اوچون تقلب گه زمینه یره‌تیلگن.
مذکور نظارتچی‌لر سیلاولر کمیسیونی‌نینگ اعضالرینی بی‌فرق یانده‌شیش و دقت‌سیزلیک‌که عیب‌لب ایتیشیچه، سیلاولر کمیسیونی‌نینگ اعضالری غیرمسلکی بولگنی باعث، سیلاونی توغری بیر شکلده مدیریت قیله آلمه‌گن.
سیاسی حزب‌لر بیر شرطنامه آرقه‌لی معلوم قیلیشیچه، سیلاو جریانیده تقلب گه عیب‌لنگن سیلاولر کمیسیونی‌نینگ ایشلاوچی‌لری و باشقه کیشی‌لرنینگ رویخطی‌نی خوفسیزلیک کینگشی، شکایت‌لرنی تینگلش کمیسیونی، باش قاره‌لاوچیلیک و کابل بوییچه یوناما دفتری گه تاپشیره‌دیلر و کیله‌جک‌‌ده سیلاولر جریانیده اولرنینگ اشتراک قیلیشی آلدی آلینه‌دی.
افغانستان رواجلنتیریش حزبی‌نینگ نماینده‌سی بس‌گل سادات، شرطنامه‌نی اوقیب ایتیشیچه، کابل‌ده اوتکزیلگن نماینده‌لر کینگشی‌نینگ سیلاوی جدی کم‌چیلیک‌لر، اصلاحات‌سیز و قانون نقطه‌ی نظریدن بوتونله‌ی ایشانچ‌سیز دیر.
شو توغریده..
عین حالده، سیلاولر ایرکین کمیسیونی‌نینگ سوزلاوچیسی‌نی اورین باسری کبرا رضایی‌نینگ ایتیشیچه، سیلاولر ایرکین کمیسیونی فنی و مالی نقطه‌ی نظردن کابل‌ده قیته‌دن نماینده‌لر کینگشی‌نینگ سیلاوی یولگه قوییلمه‌یدی.
رضایی، سیلاو جریانیده قیین‌چیلیک‌لر و چیگل‌لیک‌لر یوز بیرگنینی تَن آله‌دی؛ بیراق ایتیشیچه، سیلاولر ایرکین کمیسیونی و سیلاولر شکایت‌لرینی تینگلش کمیسیونی بحث و مذاکره یولی‌دن بو قیین‌چیلیک‌نی حل قیلیش اوچون سعی و حرکت قیله‌دیلر.
سیلاولر شکایت‌لرینی تینگلش کمیسیونی نیچه کون آلدین کابل‌ده اوتکزیلگن نماینده‌لر کینگشی سیلاوی‌نینگ نتیجه‌سینی تقلب و سِرلی بولمه‌گنی باعث، بیکار اعلان قیلگن ایدی و سیلاولر ایرکین کمیسیونی‌دن قانون اساسیده، بیر هفته‌دن سونگ کابل‌ده نماینده‌لر کینگشی‌نینگ سیلاوی قیته‌دن یولگه قوییلیشی‌نی سوره‌گن ایدی.
