بلقیس احسان او نرګس احسان دواړه خویندې دي.
دوی اوسمهال د افغانستان امریکايي پوهنتون د اقتصاد او سیاسي علومو پوهنځي لومړي کال زدهکړیالانې دي.
دغه دوه خویندې په کابل کې د امریکا سفارت د اعلان شوي بورس له ازموینې وروسته امریکايي پوهنتون ته بریالۍ شوې دي.
نرګس احسان په امریکايي پوهنتون کې د اقتصاد پوهنځي زدهکړیاله او وايي، دغه پوهنتون ټولو هغو زدهکړیالانو ته چې له ولایتونو دغه پوهنتون ته بریالي کېږي له لیلې سربېره نور امکانات هم ورته برابروي.
د پېغلې احسان په خبره، د دې پوهنتون ټول درسي توکي د امریکې پوهنتونو سره برابر دي او دا چاره د دې لامل کېږي، چې له تحصیل وروسته په اسانه د کار بازار ته جذب شي.
نوموړې وویل، د افغانستان امریکايي پوهنتون چاپېریال له جنسیتي تبعیض پاک دی.
اغلې احسان وايي، دغه پوهنتون د نجونو په برخه کې ځانګړې پالیسي لري او هره زده کړیاله دلته په یو امن او خوندي چاپېریال کې درسونه وايي.
بلقیس احسان د نرګس خور او د سیاسي علومو پوهنځۍ زده کړیاله ده.
بلقیس وايي، په امریکايي پوهنتون کې درس ویل یو جانس دی او هرچا ته دغه فرصت نه برابریږي.
نوموړې وايي، خورا خوښه ده، چې په یو معیاري پوهنتون کې درسونه وايي.
د بلقیس په خبره، که هر زده کړیال له فراغت وروسته په بهرنیو هېوادونو کې د زده کړو لېوالتیا لري په اسانۍ کولی شي لاړ شي.
دغه دوه خویندې وايي، د امنیتي ستونزو سره بیا هم خپل درسونه، نه پرېږدي او دغه پوهنتون په هېڅکله د زده کړیالانو په مخ ونه تړل شي.
