ولسمشرۍ ټاکنو ته نوماند رحمتالله نبیل د ټاکنو د وروستيو پايلو د اعلان په غبرګون کې وويل چې د ټاکنو د ګټونکي په توګه د محمد اشرف غني اعلانېدل افغانستان لپاره د بحران د نوي فصل پيل دی.
نبيل چې نن په يوه خبري کنفرانس کې خبرې کولې وويل چې نن د ولسواکۍ د مرګ ورځ وه او په اقتصادي، سياسي، امنيتي او ټولنيزو مسايلو کې د تازه بحرانونو پيل و.
نوموړي د هېواد وضعيت بحراني ياد کړ او ويې ويل چې په يو شمېر ولايتونو کې د جمهور دفاع لپاره خلکو ته وسلې وېشل شوې دي.
د امنيت او عدالت ټاکنيزې ډلې مشر خبرداری ورکړ چې له دې وروسته به يوازې ليدونکي نه وي او د درغليو پر وړاندې به درېږي.
نوموړي د ملي يووالي حکومت رهبران «ځانغوښتونکي» او بېپروا وبلل او زياته يې کړه چې د موازي حکومت جوړول هېواد بنبست سر مخ کوي او د خلکو په خير نه دی.
نوموړي تېره شپه په يوه ټوېټ کې ليکلي وو:« دا اخلاق او جسارت مو درلود چې مبارکي ورکړو؛ خو نن ورځ ورته تسليت وايم.»
په ورته وخت کې د اسلامي جمعیت ګوند د ټاکنو کمېسیون له لوري د ولسمشرۍ ټاکنو د وروستۍ پایلو اعلان «د ولسواکۍ او د خلکو رښتینې ارادې پر وړاندې نرمه کودتاه» بللې ده.
د ټاکنو خپلواک کمېسیون پرون محمداشرف غني د ولسمشري ټاکنو ګټونکی اعلان کړ.
