دافغانستان کرکټ ملي لوبډلې پخواني کپتان محمد نبي عیسی خیل راتلونکو نړیوالو سیالیو ته د ښه چمتووالي په موخه یو لړ معمولي عملیات ترسره کړه.
محمد نبي عیسی خیل په خپل ټویټر پیغام کې داسې انځورنه خپاره کړي دي چې د حجامه په نوم عملیات یې ترسره کړي چې د پیغمبر(ص) سنت طریقه ده.
ویل کېږي چې د حجامه عملیات له بدن څخه د ګنده یا مړې او غیرضروري وینې د ویستلو لپاره پخوانیو وختونو کې زیات ترسره کېده.
پخواني کپتان ال راونډر نبي عیسی خیل په خپل فیسبوک پاڼه کې د خپلو مینه والو د مینې او دعاګانو څخه مننه کړې ده او زیاته کړې یې ده چې ښایي دغه عملیات یې د روغتیا لپاره ګټور شي او په فیزیکي برخه کې یی غښتلتیا پیدا شي.
ښاغلي عیسی خیل ویلي دي چې د حجامه په نوم ددې عملیاتو په ترسره کولو سره د بدن زیاتره ناروغۍ له مینځه ځي او په ټوله کې د روغتیا لپاره ډیرګټور دي.
د ملي کرکټر محمد نبي په وینا چې د حجامې په وسیله وینه تصفیه کېږي او په بدن کې د سرې او سپینې وینې حجرې زیاتیږي.
کرکټرمحمد نبي عیسی خیل روانه میاشت په ۲۰۱۵ کال کرکټ نړیوال جام سیالیو کې د ملي لوبډلې کپتانۍ کولو او لوبیدو وروسته له خپلې کارکردګۍ خوښ نه و او له همدې کبله یې دغه دنده اصغرستانکزي ته پریښوده.
