ارزگان ولایتی‌نینگ محلی بلند مرتبه‌لی رسمیلری، «باله‌لرنی حمایت قیلووچی» خیریه اداره نینگ بیش ملازمی جسدی ولایت‌نینگ چنارتوی ولسوال‌لیگی‌دن تاپیلگن لیگی‌نی ایتگن‌لر.
مذکور شخص‌لر بوندن بیر یریم آی آلدین قورال‌لی طالب‌لر آرقه‌لی اوغیرلنیب؛ نهایت‌ده اولدیریلگن‌لر.
ارزگان ولایت سرپرستی‌نینگ سوزلاووچی‌سی دوست محمدنایاب‌نینگ ایتیشیچه، طالب‌لر مذکور شخص‌لرنی اولدیرگن‌دن سونگ، جسدلرنی مذکور ولایت چنارتوی ولسوال‌لیگی‌نینگ پاتان منطقه‌سیگه تشله‌گن‌لر.
ایتیلیشیچه، اوشبو خیریه بنیادنینگ اوغیرلنگن تورت ملازمی ارزگان ولایتی‌نینگ یشاووچی‌سی بولگن، فقط بیرهیداووچی ایسه ننگرهار ولایتی نینگ فقراسی دیر.
اوشبو انجنیرلر اداره‌لری تامانیدن مذکور منطقه‌ده قازیله دیگن قودوق‌لرنی یقیندن کوزه تیش اوچون یوباریلگن بیر چاغ‌ده اوغیرلنگن.
جنگری‌لر طرفی‌دن اوغیرلگن شخص‌لر قوییب یوباریلیشی اوچون طالب‌لر بیش محبوسی آزاد ایتیلیشی‌نی سوره‌گن. ایتیلیشیچه، قوم آقسقال‌لری‌نینگ بو توغریده آلیب بارگن سعی وحرکت‌لری نتیجه بیرمه‌گن.
اوشبو اداره قیرق ییل‌دن بیری افغانستانده باله‌لرنی حمایت قیلیش ساحه‌ده فعالیت کورسته‌دی. شونینگ‌دیک مذکور اداره فعالیت‌لری آرقه‌لی مملکت بولیب 700 مینگ باله تورلی لایحه‌لر بیلن قاپلگن.
سونگی ایکّی آی ایچیده مملکت بولیب گروگان آلیش واقعه‌لری سابقه‌سیز آشگن. ایریم گزارش‌لرده ایکّی آیده مملکت بویلب 7 گروگان واقعه‌سی روی بیریب، ایریم حال‌لرده اوغری‌لر قتل‌گه قول اورگن.
ارزگان ولایتی چوری ولسوال‌لیگی نینگ پولیس قوماندانی عبدالقیوم سلام وطندار بیلن تیلفون آرقه‌لی باغله‌نیب ایتیشیچه، اوتگن کون (جمعه) اوشبو ولسوال‌لیک‌ده یوز بیرگن پارتلش عاقبتی‌ده تورت محلی پولیس هلاک بولیب، باشقه اوچ پولیس یره‌لنگن.
قیوم‌گه کوره، پارتلش پولیس منصدارلری قرارگاه تامان حرکت‌ده بولگن بیر پیتده یوز بیرگن. ارزگان افغانستان جنوبی‌ده جایلشگن نا تینچ ولایت‌لردن سنه‌له‌دی. ایتیلیشیچه، بو ولایت‌نینگ مرکزی همده باشقه منطقه‌لریده طالب‌لر حاکمیت قیله‌دی.
