د ناټو عمومي منشي ینس سټولټنبرګ وايي، د افغان حکومت مرکچي پلاوی باید ټولشموله وي او د ټولنې ټول اړخونه پهکې ځان وویني.
سټولټنبرګ د افغان حکومت، ناټو او امریکا متحده ایالتونو د ګډې اعلامیې په غونډه کې تر ګډون وروسته له افغان ژورنالېستانو سره په خبرو کې ویلي چې په افغانستان کې سوله یوازې د افغانانو په مشري د خبرو اترو په پایله کې راځي.
نوموړي د افغان حکومت او طالبانو تر منځ د سولې هوکړهلیک تر لاسلیک وروسته په افغانستان کې د خپل حضور د دوام په اړه ویلي، که غوښتنې ترې وشي، ناټو به له افغان حکومت سره په دې اړه خبرې وکړي.
سټولټنبرګ وايي، تر هغه یې چې په افغانستان کې د ترهګرو د ځالو ورکېدو په اړه ډاډ نه وي ترلاسه کړی، افغانستان نه پرېږدي. هغه ټینګار کوي چې په افغانستان کې یې حضور د دغه هېوادد له شرایطو سره تړلی دی.
د ناټو عمومي منشي زیاتوي، که طالبان خپلې ژمنې عملي نه کړي، ځواکونه به یې په افغانستان کې پاتې شي. هغه د القاعده او داعش د فعالیتونو په اړه وویل، که له طالبانو سره جګړه پای ومومي، د داعش ډلې پر وړاندې د جګړې لپاره به هڅې ډېرې کړي.
د امریکا او طالبانو ترمنځ د سولې له میاشتو میاشتو خبرو اترو وروسته پرون د دواړو لوریو ترمنځ د سولې هوکړهلیک په دوحه کې لاسلیک شو. دغه راز افغان حکومت، د ناټو عمومي منشي ینس سټولټنبرګ او د امریکا دفاع وزیر مارک اېسپر هم په کابل کې ګډه اعلامیه خپره کړه.
د سولې هوکړهلیک له مخې به د مارچ په نهمه نېټه بینالافغاني خبرې اترې پیل او په دې موده کې به د له پنځه زره ډېرو طالب بندیانو د خوشې کولو لړۍ هم پیل شي.
