.jpg)
میدان‌وردک ولایتی کینگش اعضالریدن بیرقطاری، اوشبو ولایتده ساغلیک مرکزلر باغلنگنی‌دن خبر بیرگنلر. اولرنینگ ایتیشیچه، میدان‌شهر شامل بو ولایت بوتون تومن‌لریده ساغلیک مرکزلر طالبان تامانیدن باغلنگن دیر.
میدان‌وردک ولایتی کینگش اعضاسی شریف‌الله هوتک نینگ ایتیشیچه، طالبان گروهی بو ولایتده بولگن بوتون ساغلیک مرکزلر مسووللرینی تلفون آرقه‌لی آگاه‌لنتیریب و اولردن فعالیت‌لرینی توخته‌تیشینی سوره‌گن. جناب هوتک‌که کوره، بو ایش انگیزه‌سی بیللی ایمس.
ولایتی کینگش بو اعضاسی‌گه، حاضرده بوتون ساغلیک مرکزلر باغلنگن دیر و کسل‌لر جدی قیین‌چیلیک بیلن روپه‌ره بولگنلر.
میدان‌وردک ولایتی کینگش کسلخانه‌سی مسووللری نینگ بو خبرنی تصدیق‌لب سلام‌وطندارگه ایتیشیچه، طالبان گروهی تلفون آرقه‌لی اولرنی آگاه‌لنتیرگن.
میدان‌وردک نینگ ولایتی کسلخانه‌سی باشلیغی نادر نادری نینگ ایتیشیچه، هرکون کمیده 400 کسل بو کسلخانه‌گه مراجعت قیله‌دی و حاضرده کسل‌لر یاپیق بولگن ایشیک‌نی آرقه‌سیده، کوتیب تورگنلر.
عین‌حالده، افغانستان بوییچه سویدن کمیته‌سی نینگ اعلان قیلیشیچه، میدان‌وردک ولایتیده بو کمیته‌گه تیگیشلی بولگن 42 ساغلیک مرکز طالبان تامانیدن باغلنگن دیر.
اوشبو کمیته نینگ بیرخبرنامه آرقه‌لی ایتیشیچه، سویدن کمیته‌سیگه تیگیشلی بولگن بیر ساغلیک مرکزده دولتی کوچلر تامانیدن عملیات یولگه قوییلگنی سبب، طالبان گروهی بوتون کسلخانه‌لر و ساغلیک مرکزلرنی باغله‌گن دیر.
سویدن کمیته‌سیگه کوره، طالبان تهدیدی سبب بو کمیته‌گه تیگیشلی بولگن 77 ساغلیک مرکزدن 42 ته‌سی میدان‌ردک 6 تومنیده باغلنگن دیر.
.jpg)
بو کمیته‌نینگ کوپه‌یتیریشیچه، مذکور کسلخانه‌لر و ساغلیک مرکزلرنینگ باغلنگنی سبب، عیاللر و باله‌لر شامل 57 مینگ کسل ساغلیک خذمت‌لردن محروم قالگن.
افغانستان بوییچه سویدن کمیته‌سی مسوولی سونی مانسون نینگ ایتیشیچه، ساغلیک مرکزلرنی باغلنگنی و اهالینی ساغلیک خذمت‌لردن محروم قیلیش انسان حقلری و خلق ارا قانون‌لرینی نقض قیلیش دیر. اونینگ تاکید قیلیشیچه، ساغلیک مرکزلرنی قیته‌دن آچیلیشی کیره‌ک.
افغانستان بوییچه سویدن کمیته‌سی طالبان رهبرلریدن مذکور مرکزلرنی قیته‌دن آچیلیشی خصوصیده کیلیشوولرینی طلب قیلگن.
طالبان گروهی حاضرگه‌قدر بوتوغریده فکر بیلدیرمه‌گن. ساغلیق‌نی سقلش وزیرلیگی فکرینی آلیش اوچون سعی و حرکت قیلدیک، بیراق موفق بولمه‌دیک.
قطر ده یولگه قوییلگن افغانستان‌لیکلر ارا تینچلیک سوزلشوولرده اوشبو گروه زوره‌وانلیک‌لر کمه‌یشی خصوصیده تاکید قیلگن بیرحالده، مذکور کسلخانه‌لر باغلنه‌دی.
افغانستان‌لیکلر ارا تینچلیک سوزلشوولرده اشتراک قیلگن‌لر عامه فایده‌لنه‌دیگن نهادلرنینگ امنیتی تضمین ایتیلیشی اوستیگه تاکید قیلگن ایدیلر.
