سیلاو ایرکین کمیسیونی نینگ اعضاسی مولانامحمد عبدالله نینگ ایتیشیچه، درمالوگ شرکتی حاضرگهقدر اولرگه جمهورلیک ریاست سیلاویده اشتراک قیلگنلردن مشخص رقم بیرمهگن.
جناب عبدالله گه کوره، شونینگدیک اولر قیسی بیر رقم نی سونگی رقم صفتیده قبول قیلیش گه حاضرگچه کیلیشمهگنلر.
سیلاو کمیسیونی نینگ اوشبو اعضاسی نی اورغولشیچه، اولر بوتون سیلاو تیملری تامانیدن قبول قیلینگن رقمنی قبول قیلهدیلر.
بیراق، دولت قورووچی سیلاو تیم اعضاسی داوود سلطانزوی نینگ ایتیشیچه، اشتراکچیلرنینگ توغریسیده سیلاو ایرکین کمیسیونی تامانیدن نشر قیلینگن رقم اولر اوچون سوراق توغدیرگن.
جناب سلطانزوی گه کوره، مذکور تیم یالغیز افغانستان یشاوچیلری نینگ تنیق آوازلرینی تَن آلهدی.
برقرارلیک و یقینلیک سیلاو تیم اعضاسی یونس نواندیش نینگ ایتیشیچه، جمهورلیک ریاست سیلاویده اشتراک قیلگنلر توغریسیده سیلاو ایرکین کمیسیونی تامانیدن نشر ایتیلگن رقم درمالوک شرکتی نینگ رقمی گه ماس کیلمهیدی. اونینگ کوپهیتیریشیچه، درمالوک شرکتی اشتراکچیلرنینگ رقمینی 1 میلیون و 700 مینگ اعلان قیلگن.
سیلاو ایرکین کمیسیونی نینگ معلومات مرکزی ده آوازلرنی تازهلش جریانی حاضرگهقدر دوام ایتماقده و جمهورلیک ریاست سیلاویده اشتراک قیلگنلرنینگ رقمی قنچه بولیشی بیللی ایمس دیر.
شونینگدیک، اوتگن کون سیلاو ایرکین کمیسیونی نینگ مسؤوللری، معلومات مرکزی ده آق آوازلردن قاره آوازلرنی اجرهتیش جریانی کون نینگ کیچ پیتلری گچه یکونلنیب و بوگون جمهورلیک ریاست سیلاوی نینگ دستلبکی نتیجهسینی اعلان قیلینیش زمانی بیللی بولیشی نی ایتگن ایدی.
عبدالله عبدالله رهبرلیگیده بولگن برقرارلیک و یقینلیک سیلاو تیم اعضاسی نور رحمان اخلاقی نینگ ایتیشیچه، درمالوگ شرکتی، دبیرخانه و سیلاو کمیسیونی نینگ رهبرلیگی آرهسیده اویغونلیک یوق دیر.
جناب اخلاقی گه کوره، سیلاو کمیسیونی تامانیدن 1.9 میلیوندن آرتیق اعلان ایتیلگن بایومتریکلی آواز بیرووچیلرنینگ رقمی توغری ایمس دیر؛ چونکه 6- میزان جمهورلیک ریاست سیلاویده اشتراک قیلگن بایومتریکلی آواز بیرووچیلرنینگ رقمی 1 میلیون و 795 مینگ کیشی بولگن.
افغانستان بوییچه 6- میزان سیلاوی بیر آز تینچ فضاده یولگه قوییلدی و بو سیلاونینگ دستلبکی نتیجهسی 27- میزان ده اعلان ایتیلیشی خصوصیده قرار قیلینگن ایدی. بیراق، نتیجه تعیین ایتیلگن زمانیده اعلان ایتیلمهدی و بوگون سیلاو ایرکین کمیسیونینینگ ایتیشیچه، جمهورلیک ریاست سیلاوینینگ دستلبکی نتیجهسی 23- عقرب ده اعلان ایتیلیشی ممکن.
