بوگون (یکشنبه 5- اسد) افغانستان تینچلیک انستیتوت مسئوللری کابل ده خبری بیر ییغین اوتکزیب ایتیشلریچه، مملکت و منطقهده تینچلیک کیلتیریش توغریسیده سیاسی بیر اراده و اجماع یوق و حکومت رهبرلری تینچلیکدن قدرت گه ایریشیش اوچون بیر وسیله صفتیده قوللنهدی.
افغانستان تینچلیک انستیتوت اورینباسری بشیر هاتف نینگ ایتیشیچه، تینچلیک اوچون بیللی بیر موقف آلینمهگن و شو یوزهدن اهالی تینچلیک پروسهسی توغریسیدهگی سعی و حرکتلرگه ایشانمهی و افغانستانلیکلرارا سوزلشوولرنی هم بی فایده بیلهدیلر.
هاتف نینگ کوپهیتیریشیچه، مملکت یشاوچیلریدن 60 فایزی تینچلیک پروسهسی توغریسیدهگی سعی و حرکتلرنی استخباراتی بیر اویین بیلهدیلر.
شوندهی بیر حالده، ملی مصالحه عالی کینگش سوزلاوچیسی فریدون خوزون نینگ ایتیشیچه، ایشانچ نینگ توزهتیش اهالی نینگ همکارلیگی و تینچلیک پروسهسی نینگ نتیجهسیگه باغلیق دیر و اونگه علاوه حکومت و طالبان اهالی نینگ خواطرلریگه سونگ نقطه قوییشلری کیرهک.
عین حالده، افغانستان تینچلیک انستیتوت مسئوللری نینگ ایتیشلریچه، اوروش و منفی تبلیغات ادبیاتیدن فایدهلنیش حکومت و طالبان آرهسیده جنجللرنی کوپهیتیرگن. اونگه کوره ایکی تامان بیربیراولریگه قرشی زوروانلیکلردن قول تارتیشلری کیرهک.
