مملکت ساغلیک وزیرلیگی کرونا ویروسی گه چیلنگنلر رقمی کونسایین کوپهیگنیدن خبر بیرگن.
بوگون (دوشنبه 25- حمل) مذکور وزیرلیک سوزلاوچیسی وحیدالله مایار خبری بیر ییغین اوتکزیب ایتیشیچه، اوتگن 24 ساعت ده 7 ولایتده کرونا ویروسی نینگ 65 ایجابی واقعهسی قید ایتیلگن.
اونگه کوره، 13 کیشی کابل، 28 کیشی قندهار، 7 کیشی هلمند، 7 کیشی هرات، 6 کیشی نیمروز، 3 کیشی تخار و بیر کیشی قندوز ولایتیده کرونا ویروسی گه چلینگن.
مذکور 65 ینگی ایجابی واقعه قید ایتیلیشی بیلن مملکتده کرونا ویروسی گه چلینگنلر رقمی 672 کیشی گه ییتیشدی کیم بولردن 38 تهسی دارولنگن و باشقه 21 تهسی ایسه جان بیرگن.
ساغلیک وزیرلیگی ینه بیر مرته اهالیدن ساغلیک توصیهلرنی رعایت قیلیب اوی گه قالیشلرینی سورهگن.
شونینگدیک، کرونا ویروسی گه چلینگن بیر پولیس هم جان بیرگن.
عین حالده، هرات ساغلیک ریاستی سوزلاوچیسی محمدرفیق شیرزی، مذکور ولایتده کرونا ویروسی گه چلینگن بیر عیال هلاک بولگنیدن خبر بیرگن.
جناب شیرزی نینگ ایتیشیچه، اوشبو 45 یاشر عیال 6 کون آلدین بیر عملیاتدن کیین جان بیردی کیم اونینگ کرونا لابراتواری سیناوی بوگون بیللی بولگن.
هرات ولایتی ده حاضرگچه 280 کیشی کرونا ویروسی گه چلینگن کیم بولردن 2 عیال شامل 6 تهسی جان بیرگن.
