د پاکستان د تر ټولو ستر دیني مرکز ( وفاق المدارس) مشر مفتي محمد نعيم په کلکه رد کړې، چې په سیمه کې د ترهګرۍ او سخت دریزۍ تور دې په دیني مدرسو نه پورې کيږي.
مفتي د سخت دریزۍ او ترهګرۍ د خپراوي اصلي عامل، د پاکستاني حکومت واک لرونکې ډله په ګوته کړې ده.
بي بي سي اردو د کراچۍ ښار دځايي خبریال ریاض سهیل د یوې مرکې په حواله چې د وفاق المدارس له مشر مفتي محمد نعیم سره یې کړې؛ لیکلي چې دغه مرکز په پاکستان کې د مدرسو د راجستر کولو په څرنګوالي کلکې نیوکې لري.
پاکستاني حکومت د کورني امنیتي پلان د پالیسۍ له مخې په پاکستان کې دهغې مدرسو راجستر کولو لړۍ پيل کړې، چې په خپل سري توګه په دغه هیواد کې فعالیت کوي.
په پاکستان کې تر اوسه د هغې مدرسو چې په دیني برخو کې زدکړې ورکړي رسمي شمیره نه ده په ډاګه شوې خو د ځینو غیر رسمي سرچينو په قول په دغه هیواد کې د داسې مرکزونو شمیر لسګونه زرو ته رسيږي، چې په غیر رسمي دول فعالیت کوي.
په دغو مدرسو تور پورې کيږي، چې د اصلي دیني زدکړو پرځای طالبانو ته دسخت دریزۍ او( جهاد) روزنه ورکول کيږي.
په دغو مدرسو کې د زده کوونکو شمیر هم تر ۱۰۰ زرو لوړ ښودل کيږي.
د تېرې پنجشنبې په ورځ د پاکستان حکومتي چارواکو دکورني امنیتي پلان په اړه په ګډه غونډه کې د مدرسو د راجستر کولو په ځنډنۍ لړۍ هم نیوکې وکړې او زیاته یې کړه، چې لا هم په دې برخه کې پرمختګ نه دی شوی.
د وفاق المدارس او بنوریه ټاون مدرسې مشر مفتي محمد نعيم اوس په خپلې تازه مرکه کې د ترهګرۍ او سخت دریزۍ د خپراوي تور په پاکستاني ریاست پورې کړی.
مفتي په خپله مرکه کې د (ریاست) اصطلاح کارولې او د پاکستان په سیاسي ادبیاتو کې له ریاست څخه مقصد هغه ډله یا طبقه ده، چې دحکومتونو د پالیسۍ اصلي واګې دهغوي په لاس کې وي.
مفتي ويلي دي، چې د مدرسو راجستر او ثبت کولو سره مخالف نه دی خو د پاکستاني حکومت له هغه چلند سره مخالف دی، چې په دغه هیواد کې یې د مدرسو پر وړاندې کوي.
