مملکت جمهور رییسی‌نینگ حکومت ایشلری‌گه اصلاحات کیریتیش و یخشی حکومتدارلیک بوییچه خاص نماینده‌سی احمدضیا مسعودنینگ ایتیشیچه، طالب‌لر تینچلیک سوزلشوولری‌نی بهانه قیلیب و ساووق موسوم‌دن فایده‌لنیب کیله‌جک ییل کوکلم موسومی‌ده اوروش‌لرینی کینگه‌یتیریش اوچون تیارگرلیک آله‌دیلر.
بریتانیالیک گاردین کونده‌لیگی تامانیدن ترقه‌تیلگن گزارش‌ده ایتیلیشیچه، اوتگن ایکی آی جریانیده، افغانستان حکومت رسمی‌لری، تینچلیک مذاکره‌لری باشله‌نیشی خصوصیده، قطرده طالب‌لرنینگ نماینده‌لری بیلن اوچره‌شگن‌لر.
بیراق، قورال‌لی طالب‌لر، میدیاگه بیر خبرنامه یوباریب افغانستان حکومتی ارا اوتکزیلگن سوزلشوولرنی رد قیلگن.
پنج‌شنبه کون کابل‌ده خبری ییغین اوتکزگن احمدضیا مسعودنینگ ایتیشیچه، حکومت حربی لحاظ‌دن کوچله‌نیب و طالب‌لرنی نابود ایتمه‌گن تقدیرده، مملکت‌ده تینچلیک تأمین‌لنمه‌یدی.
جناب مسعود، حکومت و طالب‌لرنینگ سونگی سوزلشوولریدن تنقید قیله‌دی. شونینگ‌دیک، اوتگن (چهارشنبه) کون نماینده‌لر کینگشی اعضالری، بو سوزلشوولر قنده‌ی بیر شکلده یولگه قوییلگنی‌دن تنقید قیلیب و بو مذاکره توغریسیده تینچلیک عالی کینگشی و اهالی‌گه معلومات بیریلیشی‌نی سوره‌گن ایدیلر.
