آمریکا و طالبان آره‌سیده تینچلیک سوزلشوولری توخته‌تیلگنیدن سونگ، طالبان گروهی نینگ جنگریلری گه قرشی هوایی هجوملر تکرارسیز شکلده کوپه‌یدی.
مدافعه وزیرلیگی نینگ ایتیشیچه، سونگی بیر آیده طالبان نینگ ییریک قومندانلری، جنگریلری، قورال انبارلری، مالی قیناقلری و یوللری هوایی هجوملرگه دوچ کیلگن.
مدافعه وزیرلیگی سوزلاوچیسی روح‌الله احمدزی نینگ سلام‌وطندارگه ایتیشیچه، کونده‌لیک اورته شکلده 70-100 طالب هوایی هجوملر آرقه‌لی اولدیریلگن. اونگه کوره، خوفسیزلیک کوچلری نینگ آغیر هجوملری طالبان نینگ بیلی‌نی سیندیرگن.
مدافعه وزیرلیگی سوزلاوچیسی نینگ کوپه‌یتیریشیچه، چیت‌ایللیک کوچلر هوایی هجوملرده افغانستان هوایی کوچلری گه یاردم بیریشه‌دی، بیراق ییر عملیات‌لریده چیت‌ایللیک‌لرنینگ رولی یوق دیر.
اونگه کوره، حربی کوچلر سیلاو خوفسیزلیگی‌نی تأمین‌لش بیلن مشغول بولگنی باعث، حربی عملیات‌لر تیزلیک‌که ایلگری کیتمس ایدی، بیراق حاضر عملیات‌لر شدتلنگن.
بیراق، طالبان گروهی سوزلاوچی‌لریدن بیری ذبیح‌الله مجاهد، سلام‌وطندارگه یوبارگن پیامی‌ده مدافعه وزیرلیگی سوزلاوچیسی نینگ ادعاسی نی رد قیلیب ایتیشیچه: «مجاهدلر بوتون هوایی و ییر دسیسه‌لری برابریده اوزلری عیارلگن، دوشمن مجاهدلرگه آغیر زیان ییتکیزه آلمه‌یدی.»
حربی ایش بیلرمانلردن بیری عتیق‌الله امرخیل نینگ سلام‌وطندارگه ایتیشیچه، پاکستانده طالبان گروهی نینگ اصلی مرکزلری نابود ایتیلگونگه‌قدر، افغانستان توپراغیده مذکور گروه گه قرشی هوایی هجوملر دایمی تأثیر قویمه‌یدی.
عتیق‌الله امرخیل گه کوره، حربی کوچلر ساووق موسوم ده طالبان گه قرشی هوایی هجوملرینی شدتلنتیریشی کیره‌ک و باشقه تاماندن، آمریکا دولتی طالبان گه مشروعیت بیریش‌دن قول تارتیشی لازم.
