قندوز ولایتیدن مردمی منبع‌لرنینگ سلام‌وطندارگه ایتیش‌لریچه، اوشبو ولایت نینگ خان‌آباد تومنیده هوایی کوچلر تامانیدن اویوشتیریلگن هجوم عاقبتیده، 15 تینچ اهالی هلاک و یره‌لنگن.
اوشبو واقعه‌ده یره‌لنگن‌لردن بیرقطاری نینگ سلام‌وطندارگه ایتیش‌لریچه، شالی ایش‌لری بیلن شغل‌لنگن بیرچاغده، هوایی هجوم آستیگه قرار بیریلگنلر. اولرنینگ ایتیش‌لریچه، بیرینچی هجوم ده شالی‌لری اوت آلگن و اوت‌نی اوچیره‌دیگن پیتده، ایکینچی هجوم صورت تاپگن.
قندوز ولایتی بوییچه حوزه‌وی کسلخانه مسوول‌لریدن بیری عبدالروف نینگ ایتیشیچه، حاضرگه‌قدر باله‌لر شامل 4 جسد و 6 یره‌دار کیشی اوشبو کسلخانه‌گه انتقال بیریلگن.
قندوز ولایتیده انسان حقوقی ایرکین کمیسیونی نینگ ساحوی دفتری باشلیغی سید حفیظ الله فطرت نینگ ایتیشیچه، بو ایکی هجوم عاقبتیده، 12 تینچ اهالی هلاک و یره‌لنگن.
عین‌حالده، ملی مدافعه وزیرلیگی نینگ بیر خبرنامه نشر قیلیب ایتیشیچه، اوتگن "شنبه" کونی توش چاغیده، طالبان جنگریلری خان‌آباد تومنی نینگ نیک‌پی منطقه‌سیده امنیتی پوسته‌لر اوستیگه هجوم قیلگن، بیراق امنیتی کوچلر عکس‌العملی بیلن روپه‌ره بولگن.
خبرنامه‌ده ایتیلیشیچه، اوشبو هجوم ده طالبان ایکی قومندانی شامل 30 اعضاسی هلاک و باشقه 8 ته‌سی یره‌لنگن.
ملی مدافعه وزیرلیگی، هوایی کوچلر تامانیدن اویوشتیریلگن هجوم نتیجه‌سیده تینچ اهالی تلفات کورگنی‌نی رد قیلگن.
