اجراییه ریاستینینگ ایکینچی اورین باسری محمد محققنینگ ایتیشیچه، جلریز اوروشیده قمراوگه قالگن عسکرلرگه حکومت دقت قیلمهگن.
جناب محقق، جلریز واقعهسینی «مزار، بامیان و یکاولنگ»ده یوزبیرگن واقعهلر تکراری بیلیب و قمراوگه قالگن عسکرلر توغریسیده حکومت دقت سیزلیگینی جدی تنقید قیلدی.
جناب محققگه کوره، حکومت قمراوگه قالیب طالبلر بیلن 30 ساعت اوروشگن محلی پولیس کوچلریگه «یالغان» ایتگن.
اجراییه ریاستی ایکینچی اورین باسری، شنبه کونی مذکور عسکرلر جسدینینگ عایلهلریگه تاپشیریش چاغیده ایتیشیچه، عسکرلر هلاک ایتیلیب مذکور تومن جنگریلر قولیگه توشگندن کیین، حکومت یاردمچی کوچ یوبارگن.
جناب محققنینگ کوپهیتیریشیچه، بو واقعه چیگل صورتده یوزبیرگن و بو خصوصده بیر هیأت تعیین بولیب، واقعهگه قولی بار کیشیلر تانیلیب جزالنیشی کیرهک.
جناب محققگه کوره، جلریز واقعهسی تیکشیریلمهگن صورتده، ملی بیرلیک حکومتی ایشانچینی قولدن بیرهدی.
شونینگدیک جمهور رییسنینگ ایکینچی اورین باسری سرور دانش و سابق جمهور رییسنینگ ایکینچی اورین باسری محمدکریم خلیلی، جلریزده محلی پولیس کوچلرینینگ اولیمینی امنیتی ادارهلر اورتهسیده اویغورسیزلیک نتیجهسی بیلیب و بو واقعه تیکشیریلیشینی سورهگنلر.
بیراق مدافعه وزیرلیگی سوزلاوچیسی اورین باسری دولت وزیرینینگ ایتیشیچه، حربی کوچلر آز مدتده نیازلی منطقهده یوباریلهدی. اونینگ کوپهیتیریشیچه، جلریز واقعهسیگه قیینچیلیک تاپیلیب و محلی پولیس تلفاتیگه سبب بولگن. بیراق یاردمچی کوچلر توقنهشوو محلیده ییتیشیب تازهلش عملیات یولگه قویگن و دشمنگه آغیر تلفات ییتکیزگن.
گزارشلرگه کوره، بیرقطار عسکرلر هجومچی جنگریلر تامانیدن توتقونگه آلینیب باشلری کیسیلگن.
عین حالده، جمهور رییس غنی، بیر بیانیه آرقهلی هلاک بولگن عسکرلر توغریسیده طالبلرنینگ حرمت سیزلیگینی قارهلب و بو ایشنی اوروش قانونیگه قرشی دیگن.
جلریز اوروشی خاینلیک دسیسهسی
میدان وردک خلقینینگ پارلماندهگی نمایندهسی غلامحسین ناصری، جلریز تومنیده طالبلرنینگ هجومی و اوشبو تومنده محلی پولیس کوچلرینینگ آغیر تلفاتینی، خاینلیک دسیسه و حکومت کفایت سیزلیگی دیب بیلهدی.
شونینگدیک پارلمان نمایندهلریدن بیرقطاری بو واقعهنی ریجهلنگن دیب بیلهدیلر.
میدانوردک جلریز تومنیده، طالبلر و محلی پولیس کوچلری اورتهسیده یوزبیرگن توقنهشوو اوتکن هفته چهارشنبه کیچه یوزلرچه طالب محلی پولیس پوستهسیگه نیچه تامانلمه هجوم اویوشتیرگن چاغده باشلنگن.
جناب ناصری توقنهشوو جریانیده میدانوردکده بولگن، اونینگ سلاموطندارگه ایتیشیچه، ییل باشله نیشیدن کابل- بامیان قتناو یولی امنیتی توغریسیده خواطرلیکلر موجود ایدی و اولر بو خواطرلیک لرنی مرکز و ولایتی رسمیلری بیلن شریک قیلگن؛ بیراق بو رسمیلر نه فقط خواطرلیکلرگه دقت قیلمهگن بلکیم پوستهلردهگی کوچلرنی کمهیتیرگن و اوچ – تورت آیدن بویان حقوقلرینی بیرمهگن.
اونینگ ایتیشیچه، طالبلرنینگ هجومیده عسکرلر اوروش میدانیده یالغیز قالگن و کابلده هیچ بیر امنیتی رسمی اولرگه جواب بیرمهگن.
جناب ناصریگه کوره، عامه نظم کوچلرینینگ پوستهسی هجوم اویوشتیریلگن پوستهلرنی ایکی یوز مترلیگیده ایکن، لیکن مذکور پوستهلردهگی کوچلر بو توقنه شوولرده بیر اوقهم آتمهگنلر.
پارلماننینگ اوشبو نمایندهسیگه کوره، بو توقنهشوو جریانیده 27 محلی پولیس هلاک بولگن. شونینگدیک جناب ناصرینینگ ایتیشیچه، حاضر یالغیز جلریز تومنی ادارهلری حکومت قولیده دیر و اوشبو تومننی باشقه منطقهلریده توقنهشوولر دوام ایتماقده.
عین حالده، جلریز تومنی باشلیغی نقیبالله حیدرینینگ سلاموطندارگه ایتیشیچه، بو توقنهشوولرده 18 محلی پولیس هلاک بولگن و باشقه 7 تهسی یرهلنگن. اونینگ ایتیشیچه، بو توقنهشوولرده 9 تینچ اهالیهم هلاک بولگن و باشقه 2 تهسی یرهلنگن.
جلریز تومنی باشلیغیگه کوره، بو اوروشده 30 طالب هم هلاک ایتیلگن و باشقه 18 تهسی تن جراحت آلگن.
باشقه تاماندن، بوگون کابل و بامیان یشاوچیلریدن اون لرچهسی جلریزده یوزبیرگن واقعه توغریسیده ناراضلیک نمایش یولگه قویگنلر.
اعتراضچیلر بو واقعهده قربان بولگنلرنینگ صورتلرینی کوتریب، افغانستان حکومت رسمیلرینینگ واقعه توغریسیده دقت سیزلیککه عیبلهگنلر.
شوندهی بیرحالده، جمهور رییس بیر هیأتنی ایچکی ایشلر وزیری نورالحق علومی رهبرلیگیده جلریز تومنی یوبارگن. جلریز تومنیده ایچکی ایشلر وزیرینینگ ایتیشیچه، امنیتی کوچلر بار توانی بیلن کابل- بامیان و کابل- غزنی قتناویوللری امنیتینی تأمینلهیدی.
