بوگون «پنجشنبه» توش چاغی ساعت 12 اطرافیده، کابل شهری نینگ بیشینچی حوزه‌سیگه تیگیشلی قنبر تورت یولیده جایلشگن مارشال فهیم حربی بیلیم یورتی اوقووچی‌لری کوچلی بیر خودکش هجوم گه گواه بولدیلر.
کابل پولیسی نینگ ایتیشیچه، خودکش هجومچی بیلیم یورت گه کیریش اوچون قصد قیلگن ایکن، بیراق عسکرلر تامانیدن تانیلگنیدن سونگ، یانیده‌گی پارتلاوچی ماده‌نی پارتلتگن.
اوشبو واقعه گواهلریگه کوره، بو هجوم مارشال فهیم حربی بیلیم یورتی اوقووچی‌لری بیلیم یورت دن چیقه‌یاتگن بیرچاغده یوز بیرگن.
کابل پولیسی سوزلاوچیسی فردوس فرامرزنینگ ایتیشیچه، اوشبو هجوم ده 6 کیشی هلاک و باشقه 16 کیشی یره‌لنگن.
جناب فرامرزگه کوره، حاضرگچه اوشبو واقعه ده هلاک ایتیلگن‌لرنینگ کیم‌لیگی مشخص بولمه‌گن.
اوشبو هجوم مسؤولیتی نی حاضرگه‌قدر هیچ بیر گروه یا-ده کیشی بوینیگه آلمه‌گن.
مارشال فهیم حربی بیلیم یورتی میلادی 2017- و 2018- ییل‌لرده هم خودکش هجوم گه دوچ کیلگن ایدی. مذکور ییل‌لرده یوز بیرگن ایکی هجوم مسؤولیتی نی طالبان گروهی تَن آلگن ایدی.
عین حالده، قیسقه مدتلی آتیش‌کیسین و دایمی تینچلیک تأمین‌لنیشی خصوصیده سوزلشوولر و سعی و حرکت‌لر دوام ایتماقده.
ینگی‌لیک‌ده مملکت سیاسی سیمالریدن بیرقطاری، مسکوده اوتکزیلگن اوچ کونلیک ییغینده، طالبان گروهی نینگ نماینده‌لریدن هییت کونلریده افغانستان دولتی بیلن آتیش‌کیسین قیلیش‌لرینی طلب قیلگن‌لر.
