تحلیلچیلرنینگ ایتیشیچه، تینچلیک یوکسک کینگشی ایجاد ایتیلگنیدن بویان، اوشبو ریاست چوکیسی امتیاز اساسیده، بیر قطار کیشیلرگه تاپشیریلگن.
سیاسی ایش بیلرمان اسحاق اتمرنینگ سلاموطندارگه ایتیشیچه، تینچلیک یوکسک کینگش ریاستینینگ چوکیسی مملکتده تینچلیک خصوصیده ایجابی رول اوینه آلهدی، بیراق اوشبو کینگش باشلیغی هیچ بیر گروهگه تیگیشلی بولمهی تامانلر ارا ایشانچلی بولیشی کیرهک.
جناب اتمرنینگ کوپهیتیریشیچه، تینچلیک یوکسک کینگشی ریاستی دیک چوکیلر، گروهلر و کوچلی تشکیلاتلرگه امتیاز صفتیده تاپشیریلهدی و بو موضوع مملکتده تینچلیک کیلتیریش خصوصیده بیرقطارلرنینگ عقده مندلیگیگه سبب بولهدی.
انچه کونلردن بویان تینچلیک یوکسک کینگشی باشلیغی صفتیده سابق جمهور رییس بیرینچی اورین باسری محمدیونس قانونینینگ تعیین ایتیلیشی اوچون بحث اوتکزیلهدی، ایتیلیشیچه، جناب قانونینینگ اوشبو کینگش باشلیغی صفتیده تعیینلنیشی سونگی باسقیچگه ییتیشگن و حکومت باشلیغلرینینگ سوزلشوولری حاضرگچه دوام ایتماقده.
یونس قانونی بوندن آلدین مملکت وزیری و افغانستان معارف وزیری صفتیده ایشلب کیلگن. قانونی، سابق جمهور رییس حامد کرزینینگ بیرینچی اورین باسری مارشال محمدقسیم فهیم عالمدن اوتگنیدن کیین، نیچه آی اونینگ اورنیده اولتیرگن.
بیراق قطار کیشیلر تینچلیک یوکسک کینگشیگه قرشیلیک کورسهتیب و تینچلیک نامیده کینگش ایجاد ایتیلیشینی «اضافی» دیب بیلهدی.
سیاسی ایش بیلرمان عبدالبصر رنجبر ایشانچیگه کوره، اوشبو کینگش یالغیز نیچه تانیقلی کیشینینگ خرجتینی تأمینلش اوچون ایجاد ایتیلگن و بو کیشیلر دولت بیلن علاقه قوریب و قرشیلیک کورسهتیشیدن وازکیچهدی.
اونگه کوره، حاضرگه قدر تینچلیک تأمین لنیشیگه تأثیر تشلهیدیگن کیشی اوشبو کینگشده سیلهنیشی خصوصیده سعی و حرکت قیلینمهگن.
جناب رنجبر، تینچلیک یوکسک کینگشینی اضافی بیلیب ایتیشیچه، اوشبو کینگش ایجاد ایتیلگنیدن بویان خلق منفعتی اوستیگه ایجابی تأثیر تشلمهگن و اوشبو کینگش اعضالری مملکتده تینچلیک کیلتیریش اوچون هیچ بیر ایش قیلمهگن. اونینگ کوپهیتیریشیچه، جناب قانونی باشقه بولیملرگه تأثیر تشله آلهدی، بیراق بو چوکی اوچون مناسب ایمس دیر.
بیراق تینچلیک یوکسک کینگشی، قیلینگن ادعالرنی رد ایتهدی. مذکور کینگشنینگ خلق ارا مصلحتچیسی اسماعیل قاسمیار سلاموطندار بیلن تلیفون علاقه قوریب، 11 مینگ طالبنی تینچلیک لایحهسیگه قوشیلیشی، اوشبو گروه بیلن فرانسه، عرب بیرلشیک اماراتی، ناروی، قطر و سونگی پیتلرده پاکستاننی مری شهریده اوتکزیلگن اولتیریشلرنی تینچلیک یوکسک کینگشینینگ یوتوقلریدن دیب بیلهدی.
عین حالده، جناب قاسمیارنینگ قبول قیلیشیچه، حاضرگه قدر ییترلیچه نتیجه بیرمهگن. اونینگ بو توغریده ایتیشیچه، اولرنینگ اساسی قیینچیلیک لریدن بیری تینچلیک کینگشینینگ طالبان باشلیغلریگه قولی ییتمسلیگی دیر. قاسمیارنینگ ایتیشیچه، طالبان گروهی بیلن ایری اولتیریشلرنی اوتکزگن، بیراق طالبان باشلیغلری منطقه استخباراتی تشکیلاتی تامانیدن باشقریلگنی باعث، اولر بیلن ایرکین صورتده علاقه باغله آلمهگن.
تینچلیک یوکسک کینگشی خلق ارا مصلحتچیسی، اوشبو کینگش اعضالریدن کمیده 40 کیشیسینینگ مملکتده تینچلیک کیلتیریش خصوصیده هلاک ایتیلگنیدن ایسلهیدی.
افغانستان تینچلیک یوکسک کینگشی 1389- ییل دولت بیلن طالبلر اورتهسیده تینچلیک سوزلشوولریگه زمینه یرهتیش خصوصیده، سابق جمهور رییس حامدکرزی تامانیدن ایجاد ایتیلگن.
اوشبو کینگش ایجاد ایتیلیشی 1389- ییل جوزا آیینینگ یریمیده تینچلیک مصلحتی جرگهنی اساسی تکلیفلریدن بیری ایدی.
تینچلیک مصلحتی جرگهسی قوم بویوکلریدن کمیده بیرمینگ و بیش یوز کیشینینگ اشتراکیده افغانستان قیینچیلیک لرینی یکونلنتیریش خصوصیده، ییچیم یول و اینیقسه عصیانچیلر بیلن بحث اوتکزیش اوچون کابلده یولگه قوییلدی.
افغانستان تینچلیک یوکسک کینگشینینگ بیرینچی باشلیغی برهان الدین ربانی ایدی، او شهید بولگنیدن کیین، اوغلی صلاحالدین ربانی تینچلیک یوکسک کینگشی باشلیغی صفتیده تعیین ایتیلدی. حاضر اوشبو کینگشنی 68 اعضاسی بار و بو جملهدن 8 تهسینی عیاللر تشکیل بیرهدی.
