اوتگن (شنبه کون) لوگر ولایتی‌نینگ یشاوچی‌لریدن اونلرچه‌سی بیر ییغین اوتکزیب، حکومت و طالب‌لرنینگ رهبرلریدن تینچ‌لیک سوزلشوولری باشله‌نیشی‌دن آلدین آتش‌کیسین اعلان قیلینیشی‌نی سوره‌گن‌لر.
اوشبو ییغینده ولایت یشاوچی‌لری شامل جمهور رییس‌نینگ مصلحتچی‌لری، پارلمان و سنا اعضالری، ولایتی کینگش نماینده‌لری و مملکت قوم و قبایل وزیری اشتراک ایتگن.
اولر، ناتینچ‌لیک‌لر کوپه‌یگنی توغری‌سیده خواطر بیلدیریب ایتیشیچه، افغانستان حکومتی بیلن طالبلر ایجابی نتیجه‌گه ایریشمه‌گن صورتده، افغانستان یمان وضعیت‌گه دوچار بولیشی ممکن.
ییغین اشتراکچی‌لری‌نینگ ایتیشیچه، بیرلیک‌ده حرکت قیلمه‌گن صورتده، مملکت‌ده تینچ‌لیک تأمین‌لنمه‌یدی.
شونینگ‌دیک، چیگره‌لر وزیری محمدگلاب منگل‌نینگ ایتیشیچه، حکومت مملکت‌ده تینچ‌لیک تأمین‌لنیشی خصوصیده عملی ایشلرنی باشله‌گن و تیزلیک‌ده حکومت بیلن طالب‌لرنینگ اورته‌سیده تینچ‌لیک سوزلشوولری باشله‌نیشی خصوصیده قرار قیلینگن. جناب منگل، خلق‌دن تینچ‌لیک‌که ایریشیش اوچون حکومت‌گه یاردم بیریش‌لرینی سوره‌دی.
شونده‌ی بیرحالده، مملکت تینچ‌لیک تورت تامانلمه سوزلشوولرینی اوچینچی دوری کمیده بیر هفته آلدین افغانستان تینچ‌لیک ریجه‌سی اوستیگه کیلیشیش خصوصیده، پاکستانده اوتکزیلدی.
اوشبو ییغینده، افغانستان نماینده‌لیگی‌دن تشقی ایشلر وزیرلیگی‌نینگ سیاسی اورین باسری حکمت‌خلیل کرزی، پاکستان تشقی ایشلر وزیری‌نینگ اورین باسری اعزاز احمد چودری، افغانستان و پاکستان بوییچه قوشمه ایالت‌لرنینگ خاص نماینده‌سی ریچارد جی اولسن و افغانستان خصوصیده چین‌نینگ خاص نماینده‌سی دینگ شی‌جون هیأت نماینده‌لیگی‌ده اشتراک ایتگن.
اوشبو گروه، تینچ‌لیک سوزلشوولری تیزلیک‌ده نتیجه بیریشی خصوصیده، یییغین‌لری دوام ایتیشی اوستیگه کیلیشگن. دیمک افغانستان، پاکستان، چین و امیریکه اورته‌سیده‌گی تینچ‌لیک تورت تامانلمه سوزلشوولرینی تورتینچی دوری کمیده اون کوندن کیین، کابل‌ده یولگه قوییلیشی‌گه قرار قیلینگن.
