لوگر ولایتی‌ده یوزبیرگن پارتلش‌ده 7 کیشی هلاک بولیب و 18 کیشی یره‌لندی. بو واقعه‌ده هلاک بولگن‌لر ایچیده 3 پولیس و بیر باله هو کوزه‌تیلگن.
بو واقعه، 15- اسد پنج‌شنبه کون ایرته‌لب ساعت 7 ده لوگر ولایتی تیزیاردم پولیس قومندان‌لیگی یقینی‌ده یوزبیرگن.
لوگر والیسی محمدحلیم فدایی‌نینگ بو توغریده ایتیشیچه، پارتلاوچی ماده‌دن توله بولگن موتر، اوشبو ولایت تیزیاردم پولیس قومندان‌لیگی ایشیگی‌دن کیریش‌گه قصد قیلگن چاغیده، بو قومندان‌لیک کیریش ایشیگی یقینی‌ده پارتله‌گن.
باشقه تاماندن، مذکور ولایت مرکزی کسل‌خانه باشلیغی داکتر عاشق‌الله مجیدنینگ سلام‌وطندارگه ایتیشیچه، بو کسل‌خانه ساغچی‌لریدن 11 ته‌سی کسل‌خانه‌ده یقین بولگنی باعث، یره‌لنگن.
جناب مجیدی‌نینگ ایتیشیچه، واقعه نتیجه‌سیده، لوگر مرکزی کسل‌خانه‌سی تخریب بولگن و کسل‌خانه کسل‌لری کابل و محمدآغه تومنی‌گه یوباریلگن.
لوگر ولایت کینگشی اعضالریدن بیری عدالت عبدالرحیم‌زی‌نینگ سلام وطندارگه ایتیشیچه، بو پارتلش ولایتی کینگش بناسی، سوو ییتکزیش ریاستی، مرکزی کسل‌خانه و اونلرچه اوی و دکان‌لرگه زیان ییتکیزگن.
لوگر یشاوچیلری‌نینگ ایتیشیچه، بو پارتلش شونچه‌لیک کوچلی بولگن، سیسی بره‌کی‌برک، محمدآغا و خوخی تومن‌لریده ایشیتیلگن.
واقعه‌ده یره‌لنگن‌لردن بیری عبیدالله‌نینگ ایتیشیچه، پارتلش یوزبیرگن چاغده، فرزندلری بیلن اویی‌ده تفریح قیلماقده ایکن و بو پارتلش نتیجه‌سیده، تورموش اورتاغی و تورت فرزندی‌هم یره‌لنگن.
واقعه یقینیده‌گی ساتووچیلردن بیری محمدرحیم‌نینگ ایتیشیچه، 10 دن آرتیق امبولانس‌نی کورگن، واقعه محلی‌دن یره‌لنگن‌لرنی شفاخانه‌گه ییتکزگن.
اونینگ ایتیشیچه، بو واقعه‌ده 50 دن آشه تینچ اهالی یره‌لنگن و یوزلرچه اوی و دکان زیان کورگن.
طالب‌لر بو واقعه مسوولیتی‌نی بوینیگه آلیب ادعا قیلیشیچه، اوشبو واقعه نتیجه‌سیده، 100 دن آشه پولیس هلاک بولگن.
مملکت جمهور رییسی محمد اشرف غنی، بیر پیام ترقه‌تیب، حادثه‌نی قاره‌لگن.
هوایی هجوم نتیجه‌سیده 12 طالب هلاک بولگن
باشقه بیرخبرگه کوره، پنج‌شنبه کون، لوگر ولایتی پل‌علم‌ده اویوشتیریلگن هوایی هجوم نتیجه‌سیده، 12 جنگری طالب هلاک بولگن و باشقه 8 ته‌سی یره‌لنگن.
لوگر و میدان وردک ولایت‌لریده‌گی تورتینچی پیاده لوا قوماندانی عبدالرازق ساپی‌نینگ سلام‌وطندارگه ایتیشیچه، بو هجوم امیریکه کوچلری‌نینگ اوچووچی‌سیز اوچاغی تامانیدن، مذکور تومن لوزوی منطقه‌سیده اویوشتیریلگن.
جناب ساپی‌نینگ ایتیشیچه، واقعه‌ده هلاک بولگن‌لر ایچیده، طالب‌لرنینگ عبدالواحد ناملی بیر قومندانی‌هم شامل بولگن.
لوگر والیسی بیر خبری ییغین‌ده، مذکور قوماندان‌نینگ هلاک بولگنی توغری‌سیده ایتیشیچه، اونینگ، امنیتی کوچلرگه قرشی اویوشتیریلگن کوپینچه هجوم‌لر، آدم اوغیرلش و یول چیکه‌سیده ییرلشتیریلگن ماین‌لرگه قولی بار ایکن.
لوگر والیسی‌گه کوره، طالب‌لرنینگ اوشبو قوماندانی اولیشی بیلن طالب‌لر کوچسیزلنگن.
طالب‌لر حاضرگچه بو توغریده هیچ نرسه دیمه‌گن.
