لوگر ولایتیده معارف ریاستی مسؤوللرینینگ ایتیشیچه، مکتبلرده سیلاولر اوچون رویخطگه آلیش مرکزلر ایجاد ایتیلگنی باعث، یوزلرچه اوقووچی اوقیشدن محروم قالگن.
لوگر ولایتیده معارف ریاستینینگ سوزلاوچیسی شاهپور عرب نینگ سلاموطندارگه ایتیشیچه، یالغیز پلعلمده، 8 مکتبده آواز بیرووچیلرنینگ رویخطگه آلیش مرکزلر ایجاد ایتیلگن. جناب عرب گه کوره، اوشبو مرکزلر ایجاد ایتیلگنیدن سونگ، کمیده 3 مینگ اوقووچی دایمی شکلده و باشقه مینگلرچه اوقووچی وقتینچهلیک شکلده، اوقیشدن قالگن.
شونینگدیک، اونینگ ایتیشیچه، قوراللی طالبلر اوقیتووچیلر و اوقووچیلرنی سیلاولرده اشتراک قیلمسلری توغریسیده آگاهلنتیرگن.
لوگر معارف ریاستی سوزلاوچیسینینگ ایتیشیچه، بو موضوع نی مسؤول ادارهلر بیلن شریک قیلگنلر، لیکن حاضرگچه جواب قیترمهگنلر.
شونینگدیک، لوگر مرکزی مکتبینینگ آمری لطفالله گه کوره، اوقووچیلردن کوپینچهسی طالبلردن قورقگنی باعث، مکتب گه کیلمهیدیلر. اونینگ کوپهیتیریشیچه، سیلاولر ایرکین کمیسیونی و معارف وزیرلیگی بو قیینچیلیک حل ایتیلیشی توغریسیده، چاره تدبیر کورمهگن صورتده، اوقووچیلرنینگ مکتب گه بارمهسی کته قیینچیلیککه اوزگریشی ممکن.
عین حالده، اوشبو مکتبلرنی اوقووچیلرینینگ ایتیشیچه، کوپینچه کونلردن بویان مکتب گه باره آلمهیدیلر و رسمیلردن تیزلیکده بو قیینچیلیککه ییچیم یول تاپیشلرینی سورهیدی.
بیراق، لوگر پولیس قومندانلیگی سوزلاوچیسی شاهپور احمدزینینگ ایتیشیچه، اولر آواز بیرووچیلرنینگ رویخطگه آلیش مرکزلر ایجاد ایتیلگن مکتبلر خوفسیزلیگی تأمینلنیشی اوچون جدی شکلده امنیتی چاره تدبیر کورگنلر.
شوندهی بیرحالده، آواز بیرووچیلرنینگ رویخطگه آلیش جریان باشلنگنیدن بویان مذکور ولایتده طالبلر ایکی رویخطگه آلیش مرکز اوستیگه هجوم قیلگن.
