د غزني فرهنګیان وايي، پهدې ولایت کې سینما اوږد تاریخ لري او د ۱۳۵۸ کال تر پایله د غزني ښار سینما د دوشنبې په ورځ مېرمنو ته او د پنجشنبې په ورځ نارینهوو ته فلم خپرولو.
خو د وروستیو څو لسیزو جنګونو له امله دغه مهمه فرهنګي برخه غیرفعاله وه او یاد یې یوازې په خاطرو کې پاتې دی.
اوس غزني ښار کې د سینما له وروستیو فعالیتونو ۳۹ کاله تېرېږي او د اطلاعاتو او کلتور ریاست پرېکړه کړې چې د یونسکو په ۲۶ زره ډالره امریکايي مالي همکارۍ د دې ښار سینما بېرته فعاله کړي.
د غزني د اطلاعاتو او کلتور رییس بشیر محمدي سلاموطندار ته وویل، د سینما له بېرته فعالولو څخه یې موخه د هېواد د فلمجوړوونکیو له تولیداتو څخه ملاتړ، د افغانستان د اصیل فرهنګ ترویج او پهدې ولایت کې له افراطیت سره مبارزه ده.
غزني کې مدني فعالان د اطلاعاتو او کلتور ریاست د دې اقدام هرکلی کوي او وايي، ټولنه کې سینما او کتابتون یو شان ارزښت لري.
د غزني دوو مدني فعالانو شکیلا مرید او میرویس اسلمي په وینا، له دې مهمې ټولنیزې رسنۍ څخه کېدی شي ټولنه کې د مسوول وګړي د روحیې او فکر احیا کولو او د فرهنګ غښتلتیا کې ګټه واخیستل شي.
خو غزني کې ورځپاڼهلیکوال او فرهنګي فعال اسدالله جلالزی ـ چې پهدې ولایت کې د سینما په سم مدیریت بېباوره دی ـ وايي، دې برخه کې د مسلکي ظرفیتونو د نهشتوالي له امله به له سینما نه سمه ګټه وانهخېستلی شي.
د ښاغلي جلالزي په وینا، باید دې برخه کې مسلکي کسان وروزل شي چې له سینما څخه مثبته ګټه واخېستل شي.
پهداسې حال کې چې پخوانیو حکومتونو غزني کې د سینما او تیاتر لهپاره جایدادونه مشخص کړيوو؛ خو دې وروستیو ۱۵ کلونو کې ـ چې افغانستان کې د رسنیو د پسرلي موسم ګڼل کېږي ـ سینما ته هېڅ پام نهدی شوی او ان د جایدادونو برخلیک په اړه یې هم معلومات نهشته.
