د سلما بند د افغان ـ هند دوستۍ په نوم له شاوخوا ۴۲ کلونو وروسته نن (شنبه، جون ۴مه) ګټې اخیستلو ته وسپارل شو. د سلما بند د پرانیستې په مراسمو کې افغان ولسمشر محمد اشرف غني وویل، چې له سلما بند نه ګټه اخیستل په هېواد کې په روانو اوبو د نور بندونو د جوړول پيلامه ده.
ولسمشر وویل، هند د هغو هېوادونو په خلاف چې ترهګر روزي او افغانستان ته یې رالېږي، دوی افغانانو ته د ابادۍ لاس ورکړی.
غني هند د افغانستان لروغونۍ دوست هېواد وباله او زیاته یې کړه، چې سلما بند د هند او افغانانو د دوستۍ د پیاوړتیا تر څنګ په هېواد کې به د وچکالۍ جرړې وباسي او زرګونه کورنه به د برېښنا له نعمته برخمن کړي.
ولسمشر د هند هېواد له نورو مرستو هم مننه وکړه او ویې ویل، چې دغه هېواد په افغانستان کې له ۲۰۰ زیاتې رغنیزې پروژې عملي کړي دي.
په دې مراسمو کې د هند لومړي وزیر نارندرا مودي وویل، چې سلما بند د دواړو هېوادونو د اړیکو او ملګرتیا سمبول دی او زیاته یې کړه، چې د هند مرستې افغانستان شموله دي.
مودي وايي، چې هېواد یې هېڅکله له افغانستانه، نه په شا کېږي؛ په سیمې او نړۍ کې به د افغانستان دفاع کوونکی وي.
د سلما بند د پرانیستې سر سم په یو شمېر ولایتونو کې هېوادوالو د خوښي کولو په پاره نڅاوې وکړې.
دغه بند د ۸۰زره جریبه ځمکې د خړوبولو تر څنګ د ۴۲ میګاواټه برېښنا د تولید توان لري.
د سلما بند په جوړولو ۲۹۰ میلیونه ډالر لګول شوي، چې لګښت یې د هند هېواد له خوا ور کول شوی.
دغه بند د هریرود په څنډه کې د هرات د چشت شریف ولسوالۍ ته نږدې موقعیت لري.
سلما بند ۱۰۷ متره لوړوالی او ۵۵۰ متره اوږدوالی لري، چې د ۶۳۳ میلیونه متره مکعبه اوبو د ذخیره کولو توان لري.
