لغمان ولایتی نینگ محلی مسووللری، ولایت‌‍ده‌گی ایرککلر مکتبی‌دن بیریگه کیلیب توشگن راکت نینگ پارتلشی نتیجه‌سیده ایکّی اوقووچی قربان بولگن و باشقه 6 اوقووچی ایسه یره‌لندی دیگنلر.
اوشبو راکت بوگون توشدن آلدین ساعت 10:30 ده ولایت مرکزی‌نینگ «بسرام» منطقه‌سیده جایلشگن حبیب الرحمان عالی لیسه‌سی بیر صنفی‌گه کیلیب توشگن لیگینی ایته‌دی ولایت رسمیلری.
حادثه‌نی تصدیق ایتگن ولایت والیسی‌نینگ سوزلاووچیسی سرحدی زواک، مذکور راکت دولت قوراللی مخالفلری تامانیدن آتیلگن لیگینی سلام‌طوندارگه بیرگه صحبت‌ده ایتدی.
اما، ولایت معارف اداره‌سی نینگ نظارت بوییچه اداره باشلیغی امیرآغا، مذکور راکت ملی اردو مرکزی یقینیدن آتیلگن دیدی. واقعه قربانلری‌نینگ بیرچه‌سی بیر صنف نینگ اوقووچیسی دیدی امیرآغا.
اونینگ سوزلریگه قره‌گنده، حاضر محل نینگ اهالیسی جسدلرنی ییکله‌گن کوتارگن حالده نمایش یولگه قوییب ولایت مقامی‌گه کیلگنلر. اولر، حادثه عامللری قول‌گه آلینیب جزاله‌نیشینی سوره‌گنلر دیدی.
لغمان شفاخانه‌سی نینگ باشلیغی دکتر عطاالله پارتلش‌ده یره‌لگن اوقووچیلرنینگ احوالی قانیقرلی دیگن.
