لت‌وکوب یک مرد با همسر باردارش از سوی محافظان سرپرست بغلان

یک مرد در بغلان ادعا می‌کند که نگهبانان سرپرست مقام این ولایت، او و همسرش را در شهر پلخمری بی‌هیچ علتی، لت‌وکوب کرده‌اند.

محمد‌سلام در گفت‌وگو با سلام‌وطندار می‌گوید، این رویداد سه روز پیش هنگامی در شهر پلخمری رخ داد که می‌خواست همسرش  باردارش را به شفاخانۀ ولایتی بغلان انتقال دهد. او از ولسوالی بنو همسرش را به شفاخانۀ ولایتی بغلان نزد پزشک آورده بود.

محمدسلام می‌گوید، با آن که پولیس ترافیک به او اجازه داده با موتر وارد شهر شود، اما نگهبانان سرپرست ولایت بغلان، او و همسرش را لت‌وکوب کرده‌ و موترشان را تخریب کردند. اکنون وضعیت همسر این مرد خوب است.

این مرد، پولیس را در پیوند به عدم بازداشت‌ نگهبانان سرپرست بغلان به ناتوانی متهم می‌کند و می‌گوید که از همین‌رو به مشکلش رسیده‌گی صورت نگرفته است. اما پولیس بغلان می‌گوید که هنوز این مرد در این باره به فرماندهی پولیس شکایتی نکرده است.

گواهان رویداد می‌گویند که نگهبانان سرپرست ولایت بغلان این مرد و همسرش را به دلیل قیود روزگردی در شهر پلخمری، لت‌و‌کوب کرده‌اند.

محمدسلام هشدار می‌دهد و می‌گوید، اگر آن نگهبانان سرپرست ولایت بغلان که او و همسرش را در درون شهر و پیش چشم مردم لت‌وکوب کردند، زیر پیگرد قرار نگیرند، خودش این افراد را گرفتار خواهد کرد.

اما عبدالقدیم نیازی، معاون و سرپرست مقام ولایت بغلان می‌گوید، کسانی که این مرد و همسرش را لت‌وکوب کرده‌اند، زیر پیگرد قرار خواهند گرفت.