نن سهار د بغلان ولایت د مرکزي بغلان ولسوالۍ لسګونو اوسېدونکیو په ولسي جرګه کې د تخار استازي قدرتالله ذکي د ساتونکیو له لوري د ښاغلي ذکي او طالبانو ترمنځ په نښته کې د ملکیانو د تلفاتو په غبرګون اعتراض کړی او د چهارشنبې تپې په سیمه کې یې د بغلان ـ کندوز لویه لاره تړلې ده.
دوی وایي چې د ښاغلي ذکي ساتونکیو له طالبانو سره د جګړې پرمهال پر ملکیانو ډزې کړي چې په پایله کې یې یو ملکي وژل شوی او ۲تنه نور ټپیان شوي.
په همدې اړه یوه امنیتي سرچینه د نوم نه ښودلو په شرط د لاریونوالو ادعا تاییدوي.
خو قدرتالله ذکي له سلام وطندار سره په خبرو کې د دې ادعا په ردولو سره وايي، په هغه ځای چې دوی د طالبانو تر برید لاندې راغلل؛ یو ملکي کس هم نه و او ټول وژل شوي او ټپيان شوي کسان طالبانو پورې اړه لري.
پرون وروسته له غرمې د قدرتالله ذکي موټرې د کندوز پر لاره د مرکزي بغلان ولسوالۍ د چهارشنبې تپې په سیمه کې د طالبانو تر برید لاندې راغلې چې وروسته بیا طالبانو د خبرپاڼې په خپرولو سره دا پېښه تایید هم کړه.
