بیرلشگن ملتلر تشکیلاتی، عیاللر وزیرلیگی، اخبارات و مدنیت وزیرلیگی و بیر قنچه ملی و خلق ارا تشکیلاتلر قیزلر ایرته تورموشگه چیقاریلیشی آلدینی آلینیش مقصدیده لایحه ترتیب بیرگنلر.
بوگون (سهشنبه) مملکت نینگ بیرینچی عیالی بولمیش رولا غنی، کابلده بلاغتگه ییتمهگن قیزلرنی ایرته تورموشگه چیقاریشگه قرشی کورهش مناسبتی بیلن آچیلگن ییغینده، ملی بیرلیک حکومتی بو شوم پدیدهگه ضد مبارزه قیلهدی دیگن.
بو لایحه کانادا و بیرلشگن ملتلر تشکیلاتی نینگ صندوقی آرقهلی حمایت بولهدی دیگن خانم رولاغنی.
خانم غنی نینگ تعبیریچه، بلاغتگه ییتمهگن قیزلرنی ایرته تورموشگه چیقاریش نینگ آلدینی آلیش و خطرگه روپه ره بولگن قتلمنی حمایت قیلیش لایحه نینگ اساسی هدفلریدن حسابنلهدی.
مملکت بیرینچی عیالی، افغانستانلیکلرنینگ دایمی ایستهگی سالم بیر جمعیت دیر و بو ایستک ایسه زوروانلیک همده ایرته تورموشگه چیقاریش نینگ آلدینی آلیش بیلن ممکن دیدی.
کانادانینگ افغانستاندهگی ایلچیسی کینت نیفلد، افغانستانده بلاغتگه ییتمهگن قیزلرنی ایرته تورموشگه چیقاریش نینگ بیرینچی واساسی عاملی قشّاقلیک دیگن. او، بو توغریده مملکتی حکومتگه همکارلیک قیلیشی خصوصیده وعده بیرگن.
بیرلشگن ملتلر تشکیلاتی میلادی 2016- ییلده دنیا نفوسی توغریسیده ترقتگن گزارشیده، افغانستان شامل ایندی رواجلهنیش عرفهسیده تورگن مملکتلرده اوچ ته قیزدن بیرتهسی 18 یاشگه کیرمسدن اویلنتیریلیشی قید ایتیلگن ایدی.
بلاغتگه ییتمهگن قیزلرنی تورمشگه چیقاریش ساغلیق، اجتماع و اقتصادی نطقه نظردن عایلهلرگه ییریک سلبی تاثیری بارلیگی ایتیلهدی.
