قورال‌لی طالبلر فاریاب مرکزی میمنه شهری و مذکور ولایت‌نینگ دولت‌آباد، شیرین‌تگاب، خواجه سبزپوش و پشتونکوت تومن‌لری‌نینگ برقی‌نی کیسگن.
فاریاب ولایتی‌نینگ خواجه سبزپوش تومنی‌نینگ ولسوالی سیدعبدالله معصومی‌نینگ سلام‌وطندارگه ایتیشیچه، قورال‌لی طالبلر، مذکور تومن اوستیگه اویوشتیرگن هجومی‌ده ناکام بولگنی‌دن کیین، دستلب گورزاد کوتل منطقه‌سیده ترکمنستاندن کیله‌دیگن برق سیم‌لرینی کیسگن و اوندن کیین خواجه سبزپوش- شیرین‌تگاب تومن‌لری‌نینگ عمومی قتناو یولی‌نی توسگن.
جناب معصومی‌نینگ ایتیشیچه، قورال‌لی طالبلر اوتگن (شنبه کیچه) سرای قلعه، کوسه قلعه و گورزاد کوتل منطقه‌لریگه هجوم اویوشتیرگن؛ بیراق اوشبو هجوم پولیس و حربی کوچ‌لری تامانیدن آرقه‌گه چیکیلتیریلگن. هجوم نتیجه‌سیده، جنگری طالب‌لردن 2 کیشی هلاک بولیب و باشقه 2 کیشی یره‌لنگن.
بیراق کورینیشیچه، فاریاب ولایتی‌نینگ برقی کیسیلیشی، طالب‌لرنینگ اوتگن کونگی هجومی‌گه باغلیق ایمس. اوشبو گروه اعضالریدن بیرقطاری، ایکی کون آلدین، فاریاب محلی رسمی‌لری‌نینگ آگاه‌لنتیریب، نفت تانکرلری اولرنینگ نظارتی‌ده بولگن منطقه‌لرده ییتکیزیلمه‌گن صورتده، اولر دولتی نفت تانکرلرینی اوتگه یاندیریب و شونینگ‌دیک ترکمنستاندن کیله‌دیگن برق‌نی کیسیش‌لرینی ایتگن ایکن.
پشتونکوت تومنی‌ده قورال‌لی طالب‌لرنینگ قومندان‌لریدن بیری ملا نورالحق بیر خبرنامه ترقه‌تیب میدیالرگه ایتیشیچه، دولت نیچه کوندن بویان طالب‌لرگه ییتکیزیله‌دیگن نفت یولی‌نی توسگن. دیمک قورال‌لی طالبلر نیچه مرته دولت‌نی آگاه‌لنتیریب تیزلیک‌ده یول آچیلیشی‌نی سوره‌گن، بیراق دولت بو ایش‌نی قیلمه‌گن.
جناب نورالحق‌نینگ دولت‌نی آگاه‌لنتیریشیچه، تیزلیک‌ده نفت انتقال بیریله‌دیگن یول آچیلمسه، اولر دولتی نفت تانکرلرینی اوتگه یاندیریب، بار تاشیدیگن موترلرنی هدف قرار بیریب و برق پایه‌لرینی بیرمه بیر ییقیتیش‌لرینی ایتگن.
کورینیشیچه، وارداتی برق پایه‌لرینی ییقیتیش و کیسیش، طالبلر اوچون بیر لایحه‌گه اوزگرماقده. هر بیر شکلده حاضرگه‌قدر دولت عامه‌المنفعه تأسیسات‌لرنی سقلش خصوصیده قنده‌ی بیر چاره تدبیر کورگنی بیللی ایمس.
