قندوز یشاوچیلرینینگ آرهسیده نیچه کوندن بویان طالبلرنینگ هجومی توغریسیده خواطر تاپیلگن؛ یشاوچیلر بو شهر ینه بیر بار طالبلر و دولتی کوچلر آرهسیده اوروش میدانی گه اوزگریشی خصوصیده، خواطرلنماقده. طالبلرنینگ هجومی توغریسیده بولگن خبر شهرگه ترقلگن و قندوز یشاوچیلرینینگ ایتیشیچه، طالبلر شهرنینگ دروازهلریگه ییتیشگن و شهر حربی بیر قرارگاه گه اوزگرگن.
اولرنینگ ایتیشیچه، قندوز ایکی مرته سقوط قیلدی و بو ایکی مرتهده اهالی کوپلب مالی و جان زیان کوردی و حاضر باشقه کیمسه تکراری هجوم گه چیده آلمهیدی.
قندوز یشاوچیلرینینگ ایتیشیچه، هوا قارانغولیککه باشلهگنده برچه اویلریگه تامان کیتهدیلر و شهر ایسه، حربی حالتنی اوزیگه آلهدی.
قندوز ولایتی کینگش اعضالرینینگ ایتیشیچه، حکومتنینگ عملیاتلری تکرار شکلده ناکام بولگنی باعث، طالبلر ولایت مرکزی گچه ییتیشگنلر.
قندوز ولایتی کینگش اعضاسی امرالدین ولینینگ ایتیشیچه، اوشبو ولایتده جدی و کینگ حربی عملیات یولگه قوییلمهگن صورتده، قندوز اوچینچی مرته سقوط قیلیشی ممکن.
بیراق، قندوز پولیس قومندانی عبدالباقی نورستانینینگ مذکور ولایت اهالیسی گه ایشانچ بیریب ایتیشیچه، شهرگه هجوم قیلیش اوچون طالبلرگه کوچ یوق دیر و حاضر هم شهر اطرافیده امنیتی کوچلرنینگ عملیاتی دوام ایتماقده.
شونینگدیک، قندوز حاکمی عبدالجبار نعیمینینگ شهر یشاوچیلریگه سوز بیریشیچه، قندوز ینه سقوط قیلمهیدی.
نعیمی گه کوره، خاص قطعه کوچلری، دولت گه قرشی قوراللی عصیانچیلرنینگ هجوملرینی دفع قیلیش اوچون بوتونله ی تیاگرلیک آلگن.
اونینگ ایتیشیچه، بو شایعهلر دوشمن اوچون تبلیغ دیر و یشاوچیلر امنیتی کوچلرنی آلقیشلب و عصیانچیلرنینگ برابریده اولردن حمایت قیلیشلری لازم.
قوراللی طالبلر حاضر قندوز ولایتینینگ اوچ تومنی گه بوتونلهی حاکم بولیب و باشقه کوپینچه منطقهلریده هم فعالیت قیلهدی.
