شنبه‌دن یکشنبه‌گه اوتر کیچه کیچکی پیت قندوز شهری‌نینگ اوچینچی حوزه‌سیگه تیگیشلی «خاک‌کنی» منطقه‌سیده، بیر عیال بیلن رفیقه‌سی ایری تامانیدن سوییلگن‌لر.
قندوز رسمی‌لری‌نینگ ایتیشیچه، قاری نعمت‌الله ناملی قاتل کیشی، تورموش اورتاغی و باشقه قاری نوروز ناملی بیر کیشی‌نینگ باشینی کیسگن.
قندوز پولیس قومندانلیگی جنایی جرم‌لرگه قرشی کوره‌ش عمومی آمری ویس‌الدین تلاش‌نینگ سلام‌وطندارگه ایتیشیچه، قاری نوروز شنبه‌دن یکشنبه‌گه اوتر کیچه ساعت 11 اطرافیده، زنا اوچون قاری نعمت‌الله‌نینگ اویی‌گه باره دی و قاری نعمت‌الله تامانیدن تانیله‌دی.
اونینگ ایتیشیچه، قاری نعمت‌الله اویی‌گه کیلگن کیشی‌نی تانیگنی‌دن کیین، تورموش اورتاغی و قاری نوروزنی بیچاق بیلن اولدیریب و اوندن کیین، باشلرینی کیسه‌دی.
جناب تلاش‌گه کوره، قاتل گناه‌سینی بوینیگه آلگن و حاضر قماقخانه‌ده تشلنگن.
قندوز پولیس قومندانلیگی جنایی جرم‌لرگه قرشی کوره‌ش عمومی آمری‌نینگ کوپه‌یتیریشیچه، قاتل و مقتول‌نینگ ایکاوی هم اویلی‌لر.
پولیس تامانیدن قولگه آلینگن قاری نعمت‌الله‌نینگ ایتیشیچه، کیچه‌نینگ کیچکی پیتی‌ده تورموش اورتاغی اتاق‌ده یوقلیگی‌نی سیزه‌دی و بیچاق بیلن تشقری چیقگنی‌دن کیین، اونی بیر ایرکک بیلن باشقه اتاق‌دن تاپه‌دی. اونینگ ایتیشیچه: «ایکاوی‌نی اولدیرگنیم‌دن کیین، باریب منطقه وکیلی‌نی خبر قیلدیم.»
آتی فاش ایتیلمس‌لیک شرطی بیلن طب عدلی‌دن بیر منبع‌نینگ ایتیشیچه، اولرنینگ تیکشیروولری‌گه کوره، اولگن کیشی‌نینگ قارنی‌گه 10 بیچاق تیککن و اوندن کیین، باشی کیسیلگن.
