قندوز ولایتیدن آتی فاش ایتیلمسلیک شرطی بیلن اعتبارلی بیر منبعنینگ سلاموطندارگه ایتیشیچه، ایکی کیچه و کوندوز اوروشیدن سونگ قلعهزال تومنی طالبلرنینگ نظارتیگه اوتگن.
قوراللی طالبلر، «پنجشنبه کیچه» قلعهزال تومنینینگ مرکزی آقتپه قیشلاقلریگه کیرگن و «جمعه» کون ایرتهلب امنیتی پوستهلرنی اوستیگه هجوم قیلگنلر.
قندوز ولایت کینگشی اعضاسی اسدالله ساداتنینگ ایتیشیچه، برچه دولتی بنالر طالبلرنینگ قولیگه توشگن و شونینگدیک، 7 محلی پولیس مذکور گروه تامانیدن اسیر آلینگن.
بیراق، قلعهزال ولسوالی محبوبالله سعیدینینگ ایتیشیچه، قلعهزال اطرافیده اورمانلر موجودلیگی باعث، ولسواللیکدن چیققنلر و ولسواللیک ایچیده طالبلر یوق دیر.
جناب سعیدیگه کوره، اوشبو تومنده اویمهاوی اوروش دوام ایتماقده و تومن اطرافیدهگی اویلر امنیتی کوچلر تامانیدن سقلنهدی.
قلعهزال ولسوالینینگ ایتیشیچه، حاضرگچه اوشبو آتیشمهده 22 طالب هلاک ایتیلگن و اونلرچه طالب یرهلنگن، بیراق امنیتی کوچلرنینگ تلفاتی توغریسیده رقم بیرمهیدی.
لیکن طالبلر تامانیدن ترقهتیلگن خبرنامهده ایتیلیشیچه، پولیس قومندانلیگی و تومننینگ برچه پوستهلرینی نظارتگه آلیب و امنیتی کوچلرگه تلفات ییتکیزگنلر.
خبرنامهده کیلیشیچه، امنیتی کوچلرنینگ حربی جهازلری، مهمات و نقلیه واسطهلری هم مذکور گروهنینگ قولیگه توشگن.
اوتگن ایکی ییلده قندوزنینگ قلعهزال تومنی اوچینچی مرته طالبلرنینگ قولیگه سقوط قیلگن.
باشقه بیر تاماندن، شمالشرق پولیسی سوزلاوچیسی محفوظالله اکبرینینگ ایتیشیچه، قندوز-تخار قتناو یولیده امنیتی کوچلر و طالبلرنینگ آرهسیده یوز بیرگن آتیشمه ایکینچی کونیگه اوتگن و شونینگدیک، اوشبو قتناو یول یولاوچیلر یوزیگه یاپیلگن.
جناب اکبری، اوشبو آتیشمهدن چیققن تلفات توغریسیده هیچ نرسه دیمهیدی، بیراق منبعنینگ ایتیشیچه، حاضرگهقدر بو قتناو یولده 3 عسکر هلاک ایتیلگن و باشقه 6 عسکر یرهلنگن.
