مملکت شمال شرقیده جایلشگن تخار ولایتی‌نینگ محلی بلند مرتبه‌لی رسمیلری بوگون (سه‌شنبه) قندوزده یوز بیرگن اوروش نتیجه‌سیده آواره بولیب تخارده باش پنه ایزله‌گن آواره‌لر قندوز ولایتی نینگ امنیتی وضعیتی یخشی بولگنی اوچون 72ساعت ایچیده قیته ولایت‌لریگه جونه تیله دیلر دیگن‌لر.
تخار ولایتی‌نینگ محل رسمیلری قندوز ولایتی‌دن آوار بولیب تخار کیلگن خانه‌دانلر تالقان‌نینگ «دشت‌رباط» اردوگاهیده جایلشتیریلگن‌لر دیدیلر. آواره‌لرنینگ عمومی سانی 30 مینگ ایکن لیگی ایتیله‌دی. آواره‌لر استقامت قیله‌دیگن محل افلاسلیگی همده هوا ساووقلیگی باعث تیریکچلیک اولر اوچون قیین دیگن ولایت رسمیلری.
تخار ولایت والیسی یاسین ضیا، قندوزگه قیته دیگن هر بیر خانه‌دان اوچون اون تورت مینگ افغانی همده تیکین ترانسپورت خذمتی نظرده توتیلگن لیگینی اظهار قیلگن.
عین حالده، قیته‌دن اوی جالریگه سفر بَر بولگن‌لر، ینه اوروش یوز بیریشیدن خواطرده ایکن لیکلرینی تیلگه آلگنلر. ایتیلیشیچه، هنوز شهر اطرافیده‌گی قیشلاقلرده جنگریلر بار.
آواره‌لردن بیری عبدالحکیم ادیب، قندوز ینه بیر بار جنگری طالبلر قولیگه اوتیشی همده امنیت اوچون ایشانچی بولمه‌گن‌لیگیدن تشویش‌ده ایکن لیگینی بیان قیلگن.
ملی بیرلیک حکومتی وجودگه کیلگن‌دن بیری قندوز ایکینچی مرته جنگریلر اشغالیگه اوتدی. سونگی بیر آی دوامیده قندوز دولت قوراللی مخالفلری کنترولی‌گه اوتیشی نتیجه‌سیده مینگ‌لب خلق اوز یشش اوی و جایلریدن آوار بولدیلر.
