قندوز ولایتی قوراللی طالبلر قولیگه سقوط قیلگن لیگیدن بیر ییلدن آرتیق وقت اوتیشیگه قرهمهی، ولایتده فعالیت قیله دیگن بوتون چاپی ییتکرمهلرنینگ یایینی هنوز هم توختب قالگن.
قندوز ولایتیدهگی بیر قطار باسمه ییتکرمهلرنینگ مسووللری، اوتگن ییل مذکور ولایت قوراللی طالبلر قولیگه اوتیشی و بو ییتکرمهلرنینگ برچه جهاز و امکانیتلری جنگریلرگه وفادار شخصلر تامانیدن تاراج و تالان قیلینیشی بیلن ولایتدهگی برچه باسمه اخبارات واسطهلرینینگ فعالیتی توختب قالدی دیدیلر.
اما، قندوزنینگ سقوطیدن بیر ییل اوتیشیگه قرهمهی، هلی هم بو ییتکرمهلرنینگ فعالیتی همان توختب قالگن دیگن ساحه نینگ فعاللری.
ندای ملت نشریهسی نینگ امتیاز ایگهسی منهاجالدین یعقوبی سلاموطندارگه بیرگن صحبتیده، ایشانچلی امنیت بولمهگنلیگی و دییرلی بودجه یوقلیگی قندوز ولایتیده باسمه مطبوعات نینگ توختب قالگنلیگی اوچون اساسی عامل دیگن.
قندوزده یایین بیریب کیلگن کوندهلیک نینگ امتیاز ایگهسی ذبیح الله مجیدی، بیر مینگ سانده باسیلیب 6 ییلدن بیری اوزلوکسیز روشده ترقهتیلیب کیلگن اوشبو کوندهلیک نینگ فعالیتی اخیرگی بیر ییلدن بیری توختب قالگن لیگیدن نالیگن.
ولایتدهگی بای به دولت همده سرمایه یاتقیزوچیلر قندوزنی تشلب چیقیشی ییتکرمهلرنینگ قیین چیلیککه روپه ره قیلگن مسالهلردن بولگنی ایتیلهدی.
ولایتده دییرلی امنیت بولمهگن لیگی اوچون قندوزده فعالیت قیله دیگن باسمه مطبوعات نینگ بیر ییلدن بیری فعالیتی توختب قالگنلیگینی اعتراف قیلگن ولایت والیسی نینگ سوزلاووچیسی سیدمحمود دانش، محلی حکومت ییتکرمهلر مسووللرینی حمایت قیلیش ینه امنیت تامین ایتیلیشی اوچون بیرگن وعدهسیگه متعهد دیگن.
بعضی بیر انیق ملعوماتلرگه تینگن حالده، قندوز ولایتی قوراللی طالبلر نظارتیگه اوتمسدن آلدین کوندهلیک، هفتهلیک و آیلیک شامل کمیده 10ته باسمه اخبارات واسطهسی فعالیت قیلیب کیلگن، بیراق حاضرگه کیلیب بو ییتکرمهلرنینگ فعالیتی توختب قالگن.
بوندن راپه راسه بیر ییل آلدین سلاموطندار رادیوسی قندوز ولایتیده باسمه مطبوعات فعالیتی توختب قالگن لیگیگه بغیشلب گزارش نشر قیلگن ایدی. اما، کورینیشیچه بیر ییل ایچیده هم بو ولایتده باسمه مطبوعات قیته فعالیتگه باشلش اوچون اعتبار بیریلمهگنلیگی سیزیلهدی.
