اوتگن کیچه (چهارشنبه) قندوز و تخار ولایت‌لریده قتیق داوول باشلندی و بوگون ایرته‌گچه بغلان، سمنگان، بلخ و باشقه مملکت شمالی و شمال‌شرقی ولایت‌لری‌گه ییتیشدی. دیمک، داوول چقان‌لیگی حاضرگچه مملکت هواشناسلیک اداره‌سی تامانیدن معلوم قیلینمه‌گن، بیراق اونی چقان‌لیگی مذکور ولایت‌لر خلقی‌نینگ حیاتی‌نی قیین‌چیلیک‌که روپه‌ره قیلگن.
باغدارلر و ایکینچی‌لردن بیرقطاری‌نینگ ایتیشیچه، اوشبو داوول نتیجه‌سیده میوه‌لری و ایکینزارلری، نابودلیک خطری‌گه روپه‌ره بولگن و داوول قتیق‌لیگی باعث، ایریم ولایت‌لرده برق جریانی کیسیلگن.
قندوز ولایتی‌نینگ یشاوچی‌لریدن بیری غلام حیدرنینگ ایتیشیچه، داوول اوتگن کیچه باشلنگن و توپراق یامغیر دیک یاغر ایکن. غلام حیدرگه کوره، اوشبو داوول میوه باغلری و ایکینچیلیک ییرلرگه کوپلب زیان ییتکیزگن.
بغلان یشاوچی‌لری‌نینگ ایتیشیچه، اوشبو ولایت فضاسی چنگ بیلن قاپلنگن و احتمالی خطردن خواطرلنگن‌لری باعث، برق جریانی مذکور ولایت برق مسؤول‌لری تامانیدن کیسیلگن.
شونینگ‌دیک، مزارشریف یشاوچی‌لریدن بیری محب‌الله‌نینگ سلام‌وطندارگه ایتیشیچه، داوول بوگون ایرته‌لب قتیق چنگ بیلن باشلنگن.
مملکت شمالی و شمال‌شرق ولایت‌لری یشاوچی‌لریدن بیرقطاری، داوول دوامیدن خواطرلنیب ایتیشیچه، اوشبو «طبیعی آفت» ایرته‌گچه توختمه‌گن تقدیرده، اهالی‌نینگ جانی و مالی‌نی جدی خطرگه روپه‌ره قیله‌دی.
