کیلهسی هفته حکومت قالگن نامزد وزیرلرنی مجلسگه معرفی قیلیشی ممکن.
جمهور رییسلیک مطبوعات دفتری سرپرستی شاهحسین مرتضوی نینگ سلامطنداگه ایتیشیچه، ملی بیرلیک حکومتی باشلیغلری ارا قالگن ۸ نامزد وزیرنی مجلسگه معرفی قیلیش بارهسیده سوزله شیشلر جریانی بار، تیزلیکده اوشبو نامزد وزیرلر اسمی نهایی قیلینیب و کیلهسی هفته مجلسگه یوباریلیشی ممکن.
اونگه کوره، ینگی معرفی قیلینگن نامزد وزیرلر ارا ایش بیلرمان و اوقیگن شخصلر هم بار.
هرچند جمهور رییسلیک سرایینینگ مطبوعات دفتری سرپرستی ینگی معرفی قیلینهدیگن نامزد وزیرلردن آت توتمیدی، ایتیشیچه، نامزدلردن ایریمی حاضرگی سرپرست وزیرلر بولگن.
اجراییه ریاستینینگ مطبوعات دفتری اورین باسری جاوید فیصل نینگ ایتیشیچه، سرپرستلر تامانیدن اداره بولیب کیلهدیگن وزیرلیکلرگه نامزد وزیر معرفی قیلیش بارهسیده حکومت ایش باشله گن و نمایندهلردن ایشانچ آواز آلیش اوچون مجلسگه معرفی قیلینهدی.
فیصلگه کوره، ملی بیرلیک حکومتی نینگ کابینه اعضالری تکمیل بولیش موضوعی اساسی گپلریدن سنلهدی.
.jpg)
ایریم وزیرلیکلر اینیقسه امنیتی و سکتوی وزیرلیکلر سرپرستلر تامانیدن باشقریلیشی ملی بیرلیک حکومتی نینگ مینگلرچه قیینچیلیکلریدن بیری سنلهدی.
ثور آیی نینگ سونگی هفتهسیده حکومت تامانیدن مجلسگه یوباریلگن مدافعه وزیرلیگی نامزدی طارقشاه بهرامی، ایش و اجتماع وزیرلیگی نامزدی فیضالله ذکی و کانلر وزیرلیگی نامزدی نرگس نهانلرگه نمایندهلر آواز بیریش صندوقینی قویمهدیلر و حکومتدن سرپرستلر تامانیدن باشقریله دیگن قالگن ۸ وزیرلیک نامزدلری لیستی مجلسگه یوباریلمه گن تقدیرده بو اوچ نامزد وزیرگه ایشانچ آواز بیرمسلیکلرینی تیلگه آلدیلر.
اوتگن ییل عقرب آییده نمایندهلر کابینه وزیرلریدن ۱۶ تهسینی ییللیک بودجهلریدن ۷۰ فایزینی مصرف قیله آلمه گنلیککه عیبلب استیضاح قیلگن ایدی که بولردن تشقی ایشلر وزیری، یوکسک تحصیلات، مخابرات، فواید عامه، معارف، ترانسپورت، ایش و اجتماع و ایکینچیلیک وزیرلریدن صلاحیتلری آلیندی.
بیراق ایتی آی اوتیشی بیلن حاضر هم بو ایشدن آلینگن وزیرلر ایشلرینی دوام بیریب کیلماقدهلر.
بو مجلس اعضالری تامانیدن صلاحیتی آلینگن وزیرلیکلرگه قوشیمچه، اخبارات و مدنیت، چیگره قوملر و قبیلهلر وزیرلیکلری هم سرپرستلر تامانیدن اداره بولیب کیلماقده. اما کورینیشیچه، حاضرگه قدر حکومت بوتوغریده هیچ قندهی بیر سعی و حرکت قیلمهگن.
