طالبان گروهی اوتگن ایکی کیچه جریانیده فراه شهری نینگ قطار بولیمی و اوشبو ولایت قتناو یولی‌ده ملی اردو کاروانی اوستیگه هجوم قیلگن.
فراه ولایتی کینگش اورین باسری شاه‌محمود نعیمی نینگ سلام‌وطندارگه ایتیشیچه، مذکور هجوم‌لرده مردمی کوچلر قومندانی و نماینده‌لر کینگشی اعضاسی عبدالستار حسینی نینگ ایناغه‌سی عبدالحکیم حسینی شامل مردمی کوچلردن 13 ته‌سی هلاک ایتیلیب و باشقه 18 ته‌سی یره‌لنگن دیر.
جناب نعیمی‌گه کوره، طالبان گروهی اوتگن کیچه فراه شهری نینگ حیدرقلی، دارآباد و سلطان‌میر منطقه‌سیده مردمی کوچلر و پولیس پوسته‌لری اوستیگه هجوم قیلگن.
ایکی کیجه آلدین ملی اردو کاروانی گلستان تومنیدن فراهرود منطقه‌سیده باره‌دیگن بیر چاغده، طالبان کمینی بیلن روپه‌ره بولگن.
طالبان گروهی بو واقعه‌ده ملی اردو عسکرلریدن 30 ته‌سی نینگ اولدیرگنی‌نی ادعا قیلگن، بیراق امنیتی منبع‌لردن بیرنینگ کیم‌لیگی سیرقالیش‌نی ایستهب ایتیشیچه، بو واقعه‌ده ملی اردو کوچلریدن 4 ته‌سی هلاک ایتیلیب و باشقه 8 ته‌سی یره‌لنگن دیر.
فراه ولایتی کینگش اعضاسی خیرمحمد نورزی نینگ مرکزی حکومتدن تنقید قیلیب ایتیشیچه، امنیتی کوچلر هرکیچه طالبان هجومی سبب جان‌لرینی قولدن بیره‌دیلر، بیراق حکومت بوتوغریده دقت قیلمه‌یدی.
فراه مدنی فعاللری نینگ ایتیشیچه، فراه شهری هر کیچه طالبان هجوم‌لریگه گواه بوله‌دی.
فراه پولیس قومندانلیگی، فراه شهری نینگ قطار بولیم‌لریده صورت تاپگن هجوم‌نی تصدیق‌لب ایتیشیچه، بو واقعه‌لرده نمانیده‌لر کینگشی اعضاسی عبدالستار حسینی نینگ ایناغه‌سی شامل امنیتی و مردمی کوچلردن 4 ته‌سی هلاک ایتیلیب و باشقه 3 ته‌سی یره‌لنگن دیر.
فراه پولیس قومندانی غلام‌محی‌الدین خیرخواه نینگ ایتیشیچه، امنیتی کوچلر و طالبان گروهی آره‌سیده یوز بیرگن آتیشمه‌لرده طالبان گروهی کوپینچه تلفات کورگن.
فراه مملکت غربی‌ده جای‌لشگن ناتینچ ولایتلردن بیری دیر و طالبان گروهی گاه‌گاهی بو ولایتده امنیتی کوچلرنی هدف آستیگه قرار بیره‌دی.
