فراه ولایت کینگشی اعضالریدن بیرقطارینینگ ایتیشیچه، مذکور ولایتنینگ بالابلوک تومنیده حربی پوستهلردن بیرینی اوستیگه طالبان تامانیدن اویوشتیریلگن گروهی هجوم نتیجهسیده، حربی کوچلردن 17 تهسی هلاک ایتیلگن.
ولایتی کینگش اعضالرینینگ آگاهلنتیریشیچه، وضعیت شوندهی بیر شکلده دوام قیلگن صورتده، بو ولایت سقوط قیلیشی ممکن.
بوگون «شنبه» فراه ولایتیده خبری ییغین اوتکزگن ولایتی کینگش اعضالرینینگ ایتیشیچه، محلی اداره کوچسیزلیگی، حکومتنینگ دقت سیزلیگی، حربی تشکیلات و جهاز کملیگی و قوشنی مملکتلرنینگ استخباراتی نفوذی باعث، بو ولایتده ناتینچلیک میزانی آشیب و امنیتی کوچلر آغیر قربانلیک بیرهدی.
فراه ولایت کینگشی اعضاسی دادالله قانع نینگ ایتیشیچه، فراه ولایتینینگ 517 قتناو یولی بوتونلهی طالبلرنینگ نظارتیده دیر و عین حالده، هر کیچه بیر پوسته مذکور گروه نینگ نظارتی گه اوتهدی؛ بیراق حکومت حاضرگهقدر بو توغریده تأثیرچن بیر ایش قیلمهگن.
فراه ولایت کینگشی اعضالریدن باشقه بیری خیرمحمد نورزایی نینگ ایتیشیچه، اوشبو ولایتده ینگی والی تعیین ایتیلگنیدن بویان، 3 تومن برچه حربی جهازی بیلن طالب لرنینگ قولی گه توشگن؛ بیراق حکومت حاضرگچه تینچ تورگن.
عین حالده، فراه حاکمی سوزلاوچیسی ناصر مهری، اوشبو ولایت برابریده محلی اداره دقتسیزلیگینی تَن آلمهیدی؛ بیراق ایتیشیچه، امنیتی کوچلرنینگ تشکیلاتی آزلیگی باعث، بو کوچلرنینگ تلفاتی کوپهیگن.
فراه ولایت کینگشینینگ اعضالری، اوتگن 3 کونده مذکور ولایتده طالبلرنینگ گروهی هجوملری نتیجهسیده امنیتی کوچلردن کمیده 30 تهسی هلاک ایتیلیب و یرهلنگنیدن سونگ، بو ولایتده امنیتی وضعیت یمانلیگیدن تنقید قیلیشگه باشلهگن.
